Қазақстанда шекарадағы күту аймақтарына жаңа талаптар енгізіледі

Қазақстанда шекарадағы күту аймақтарына қойылатын жаңа талаптар енгізу жоспарланып отыр. Бұл бастама инфрақұрылым параметрлерін, жол қозғалысын ұйымдастыруды және техникалық жабдықталу деңгейін нақты реттеуді көздейді. Тиісті бұйрық жобасын көлік министрлігі «Ашық НҚА» порталында қоғамдық талқылауға шығарды, деп хабарлайды Kapital.kz іскерлік ақпарат орталығы.

Жобада күтуге арналған сервистік аймақтарды жобалау кезінде географиялық орналасу, өткізу пункттерінің өткізу қабілеті, болжанатын көлік ағындары, сондай-ақ жер бедері мен климаттық жағдайлар ескерілетіні көрсетілген.

Жол-көлік схемасы көлік құралдарының қауіпсіз қозғалысын қамтамасыз етіп, өткізу қабілетін барынша арттыруға бағытталуы тиіс. Бұл ретте қозғалыс ағындары кіру, сәйкестендіру, күту, қызмет көрсету және шығу кезеңдеріне бөлінеді.

Сервистік күту аймақтары автотұрақ, коммерциялық және әкімшілік секілді үш негізгі блоктан тұрады. Автотұрақ аймағында жүк және жеңіл көліктер бөлек орналастырылады, сондай-ақ терминалдар мен мобильді қосымшалар арқылы тіркелетін электронды кезек жүйесі енгізіледі. Автотұрақтың ең төменгі сыйымдылығы кемінде 200 жүк көлігіне есептелуі тиіс.

Коммерциялық аймақта жүргізушілер мен тасымалдаушыларға арналған қызмет көрсету нысандары орналасады. Әкімшілік аймақ оператор мен қажет болған жағдайда мемлекеттік органдардың бөлімшелерін орналастыруға арналған.

Талаптардың жеке блогы техникалық жабдықталуға қатысты. Күту аймақтары кіру және шығуды автоматты бақылау жүйелерімен, мемлекеттік нөмірлерді танитын көлік есебін жүргізу жүйелерімен және мемлекеттік органдардың ақпараттық жүйелерімен интеграция мүмкіндігімен жабдықталуы тиіс. Сонымен қатар қауіпсіздік жүйелері, тұрақты мобильді байланыс пен интернет қолжетімділігі қарастырылады.

Жаңа талаптар сервистік күту аймақтарының сенімді жұмысын қамтамасыз етіп, көлік ағындарын тиімді басқаруға және транзиттік тасымал қызметінің сапасын арттыруға мүмкіндік береді.

Бұл талаптар жаңа нысандар салу кезінде де, қолданыстағы күту алаңдарын жаңғырту барысында да қолданылады.

Бұған дейін мемлекеттік шекарада электронды кезек жүйесін өзгерту мәселелері де талқыланған болатын. Атап айтқанда, кезекті брондау құнын белгілеу, жекелеген жүк түрлері үшін (тірі мал, тез бұзылатын тауарлар, қауіпті жүк, экспорттық өнімдер) басымдықты кезек енгізу, сондай-ақ брондау мен бақылау рәсімдерін жетілдіру ұсынылған.

Сондай-ақ CargoRuqsat сервисі қате нөмірлермен тіркелген кезектерді автоматты түрде жоятыны белгілі болды. Бұл шаралар кейбір шетелдік тасымалдаушылардың заңсыз схемаларды қолдануына байланысты қолға алынған.