Түркістан облысындағы өртке байланысты үкіметтік комиссия құрылды

Мемлекет басшысының тапсырмасы бойынша Түркістан облысы, Жетісай ауданы, Алғабас ауылындағы жеке үйде болған өрттің себептерін тергеу үшін Үкіметтік комиссия құрылды, деп хабарлайды Премьер-Министрдің баспасөз қызметі.

Премьер-министрдің орынбасары Қанат Бозымбаевтың төрағалығымен құрылған комиссия құрамына Төтенше жағдайлар, Ішкі істер, Денсаулық сақтау, Еңбек және халықты әлеуметтік қорғау министрліктерінің, Түркістан облысы әкімдігінің басшылығы енгізілді.

Зардап шеккендер мен қаза тапқандардың отбасыларына барлық қажетті медициналық және психологиялық көмек көрсетіледі. Әкімдікке өрт салдарынан қаза тапқандарды жерлеуді ұйымдастыруға жәрдемдесу тапсырылды. Тергеу қорытындысы бойынша қосымша шешімдер қабылданатын болады.

Комиссия жұмысы ерекше бақылауда.

Бұған дейін Түркістан облысындағы өрт кезінде адамдардың қаза табуына байланысты Президент Қасым-Жомарт Тоқаев көңіл айтқаны хабарланған болатын. Ол Үкіметке және облыс әкіміне қаза тапқандардың жақын туыстарына барлық қажетті көмекті көрсетуді және орын алған қайғылы оқиғаның себептерін тергеуді тапсырған.

Айта кетейік, бүгін, 18 қарашада Түркістан облысының Төтенше жағдайлар департаменті Жетісай ауданы, Алғабас ауылындағы жеке үйде өрт болып, 12 адамның, оның ішінде тоғызы баланың қаза тапқаны туралы хабарланды. Өрт сөндіру кезінде үйден үш адам ес-түссіз күйде эвакуацияланғаны айтылады.