Қазақстанда су есептегіш құралдарға жаңа талаптар бекітілді

Қазақстанда су есептегіш құралдарға жаңа талаптар бекітілді, деп хабарлайды Kapital.kz өнеркәсіп және құрылыс министрлігінің баспасөз қызметі сілтеме жасап.

«Қазақстан Республикасы Өнеркәсіп және құрылыс министрінің бұйрығымен елді мекендердің сумен жабдықтау және су бұру жүйелерінде су есептеу құралдары мен жүйелерін таңдау, монтаждау және пайдалану қағидаларына түзетулер бекітілді», – деп хабарлады министрлік.

Нақтылай кетсек, жаңартылған қағидалар деректерді ақпараттық-өлшеу жүйелеріне (ИӨЖ) және энергия тұтынуды есепке алу жүйелеріне автоматты түрде беруді қамтамасыз етуге бағытталған.

«Өзгерістер деректерді берудің бірыңғай желісі – NB-IoT-қа қойылатын талаптарды белгілеуді, сондай-ақ LoRaWAN технологиясын пайдалану мүмкіндігін қарастырады. Бұл ретте есептеу құралдарын пайдалану NB-IoT желісіне басымдық бере отырып жүзеге асырылады, ал бұрын орнатылған LoRaWAN технологиясын қолданатын құралдар қызмет ету мерзімі аяқталғанға дейін пайдаланылуы мүмкін», — деп хабарлады ведомство.

Құжатта сондай-ақ мынадай толықтырулар ескерілген:

* деректерді қашықтан жинау және беру ұғымы айқындалды;

* энергия тұтынуды автоматтандырылған есепке алу жүйесін (АСУЭ) енгізу;

* есептеу құралдарын орнатылған орны, жұмыс істеу қағидаты және деректерді беру тәсілі (NB-IoT, LoRaWAN) бойынша жіктеу;

* есептеу құралдарын монтаждау, пайдалану және кепілдік мерзіміне қойылатын талаптар.

Сонымен қатар, құжатта есептеу құралдарына кемінде бес жылдық кепілдік қызмет көрсету мерзімін белгілеу талабы бекітілген.

Бұған дейін Қазақстанда халықты суды үнемді тұтынуға ынталандыру жоспарланып отырғаны хабарланған болатын.

Өз Жолдауында президент Қасым-Жомарт Тоқаев тұрғын үй-коммуналдық шаруашылық саласында жаңа экологиялық және санитарлық-гигиеналық нормаларды енгізу қажеттігін атап өтті.

«ТКШ саласында ресурстарды үнемді тұтынуды ынталандыратын жаңа экологиялық және санитарлық-гигиеналық нормаларды енгізу қажет. Табиғи ресурстарды, әсіресе суды үнемдеу мәдениетіне келсек, бұл бағытта мойындау керек, бізде әлі де үлкен мәселелер бар. Бұл – азаматтар арасында, әсіресе жастар арасында түсіндіру, тіпті идеологиялық жұмыстың жеке бағыты. Қазірдің өзінде біз табиғи су тапшылығын сезінудеміз, ал тұтыну мәдениетінің деңгейі көңіл көншітпейді», — деді мемлекет басшысы.