2026 жылы тұрғын үйде табиғи қауіптерден міндетті сақтандыруды енгізу жоспарланып отыр

Тұрғын үйді апаттық қауіптерден міндетті сақтандыруды 2026 жылы енгізу жоспарланып отыр. Бұл туралы бүгін Қазақстан қаржыгерлерінің XIII Конгресі барысында ҚР Қаржы нарығын реттеу және дамыту агенттігінің төрағасы Мадина Әбілқасымова мәлімдеді, деп хабарлайды Kapital.kz іскерлік ақпарат орталығының тілшісі.

«Мен үнемі айтып жүрмін, бізде сақтандыру нарығы дамуы үшін зор әлеуетке ие. Ол тұрақты өсім көрсетуді жалғастырып келеді. Нарықты, тұтынушылардың құқықтарын қорғауды одан әрі дамыту үшін агенттік міндетті сақтандырудың жаңа түрін енгізді. Біз жыл сайын міндетті сақтандыру түрлерін біртіндеп кеңейтіп келеміз», - деп түсіндірді ол.

Биылғы жылы бұл – адамдар көп жиналатын объектілер иелерінің жауапкершілігі болды. Жиынтықталған өмірді сақтандырудың барлық түрлеріне сақтандыру төлемдеріне кепілдік беру қорының кепілдіктері кеңейтілді.

«Сақтандыру ұйымдарына да, банктерге де IT-компанияларға инвестициялау құқығы берілді. Азаматтардың мүлкін табиғи қауіптерден қорғау үшін «Тұрғын үйді апаттық қауіптерден міндетті сақтандыру туралы» заң жобасы әзірленді. Ол 2026 жылы іске асырылады деп жоспарланған», - деп атап өтті реттеуші басшысы.

Капитал нарығы да қаржы реттеушісінің назарындағы негізгі фокусқа айналып отыр. Агенттік қор нарығы инфрақұрылымының цифрлық трансформациясын аяқтады. Соңғы төрт жылда сауда есеп айырысу-клирингтік жүйе жаңғыртылды.

«Барлық сегменттерге орталық контрагент енгізілді. Орталық депозитарий ұстаушылар мен бағалы қағаздар тізілімдерін жүргізуді автоматтандырды. Эмитенттердің корпоративтік әрекеттерінің порталы іске қосылды, сондай-ақ шетелдік инвесторлардың тікелей қол жеткізуі үшін жағдайлар жасалды. Біз Euroclear, Clearstream және BNY Mellon-мен депозитаралық байланыстарды кеңейттік. Банктерге орталық депозитарий жүйесінде резидент еместердің шоттарын басқару құқығы берілді», - деп нақтылады Әбілқасымова.

Агенттік басшысы қор нарығын одан әрі дамыту бойынша негізгі қадамдардың бірі ретінде Ұлттық рейтинг агенттігін құруды атады.

«Тиісті заң жобасы әзірленді, жыл соңына дейін агенттік оны Парламентке енгізеді. Бұдан басқа, инвестициялық қорлар бойынша жаңа заң жобасы әзірленді. Ол инвестициялық қорлардың түрлерін едәуір кеңейтеді және осы қызмет түрі үшін құқықтық негіз жасайды», - деп атап өтті ол.

Бұған қоса, агенттік Ұлттық банк және АХҚО-мен бірлесіп, бағалы қағаздар нарығын дамыту үшін заңнамалық реттеуші жағдайларды дамыту бойынша жұмысты жалғастыруды жоспарлап отыр.

«Сондай-ақ «Бағалы қағаздар нарығы туралы» заңның өзін өзгерту қажет. Нарықпен бірлесіп, менің ойымша, біз бұл жұмысқа 2026 жылы кірісеміз», - деп нақтылады ҚНРДА басшысы.

Еске сала кетейік, бұған дейін Мадина Әбілқасымова тұрғын үйді апаттық қауіптерден сақтандыру тетігі қандай болатынын хабарлаған болатын. Қаржы реттеушісі басшысының айтуынша, сақтандырудың көп деңгейлі жүйесі қарастырылады. Бірінші деңгей сақтандыру оқиғасы туындаған кезде мемлекет тарапынан белгілі бір төлемдерді қамтиды. Екінші деңгей – халықаралық ұйымдардан жедел, төтенше қарыздарды (emergency loans) тарту. Үшінші деңгей апаттық қауіптерге ұшыраған өңірлерде тұратын қазақстандықтардың сақтандыру жарналарын енгізуді көздейді.