Тоқаев пен Трамппен келіссөзі: Екі ел арасында 17 млрд долларға келісімге қол қойылды

Қазақстан Президенті Қасым-Жомарт Тоқаев Вашингтонға сапары аясында АҚШ Президенті Дональд Трамппен келіссөз жүргізді. Бұл туралы Ақорда хабарлады.

Ақ үйде өткен кездесуде Тоқаев АҚШ Президентіне Вашингтонға сапармен келуге шақырғаны және қазақстандық делегацияға көрсеткен қонақжай көңілі үшін ризашылық білдірді.

Сонымен қатар, Қазақстан басшысы Дональд Трамптың президенттік лауазымының тарихи сипатына тоқталып, оның басшылығымен АҚШ әлемнің жетекші экономикалық, саяси және технологиялық державасы ретіндегі позициясын күшейтіп келе жатқанын атап өтті.

Қазақстан Президентінің айтуынша, Америка көшбасшысы жер жүзінің қауіпсіздігін, тұрақтылығы мен өркендеуін қамтамасыз етуде шешуші рөл атқарады.

Бұған қоса, ол Қазақстан АҚШ Президентінің бітімгерлік бастамаларын толық қолдайтынын жеткізді. Соның ішінде келешекте Орта дәлізді одан әрі дамытуға ықпал ететін «Трамптың халықаралық бейбітшілік және өркендеу жолына» (TRIPP) ерекше назар аударды.

Дональд Трамп АҚШ-тың Қазақстанмен көпжоспарлы кеңейтілген стратегиялық серіктестікті дамытуға ниетті екенін растады.

Сапар аясында Қазақстан мен Құрама Штаттары арасында жалпы сомасы 17 миллиард доллардан асатын коммерциялық келісімдерге қол қойылды.

Әңгімелесу барысында екіжақты ықпалдастықтың кең көлемдегі мәселелері жан-жақты талқыланды, өзара тиімді ынтымақтастықтың перспективті бағыттарын нақтылап халықаралық күн тәртібінің өзекті мәселелері жөнінде пікір алмасты.