Siemens АҚШ-та жасанды интеллект әзірлемелеріне 1 млрд еуро инвестиция салмақ
Компания Еуроодақ аумағында ережелердің қатаңдатылуына байланысты АҚШ нарығына басымдық беруді көздеп отыр
Siemens компаниясы Еуроодақ жасанды интеллект секторын реттеу талаптарды жұмсартпаса, осы бағытқа инвестиция салуда АҚШ пен Қытайға басымдық береді. Бұл туралы компанияның бас директоры Роланд Буш мәлімдеді, деп хабарлайды Интерфакс-Қазақстан.
Роланд Буштың айтуынша, Siemens өнеркәсіптік жасанды интеллект әзірлемелеріне бағыттауды жоспарлаған 1 млрд еуро инвестициясының негізгі бөлігі АҚШ-қа салынады. Бұған Еуропадағы шамадан тыс реттеуші жүктеме себеп болып отыр.
Оның айтуынша, еуропалық реттеу нормалары (AI Act және Data Act) көздеген мақсатқа толық сай келмейді, себебі олар өнеркәсіптік жасанды интеллектіні тұтынушылық қосымшалармен бірдей деңгейде реттеп, онсыз да салалық талаптар қолданылып жүрген бағыттарға қосымша бақылау тетіктерін енгізеді.
«Өнеркәсіптік және машина деректерін жеке деректер сияқты реттеу – қисынсыз. Бізді тежейтін ортаға инвестиция салуды акционерлеріме түсіндіре алмаймын», – деді ол Ганновердегі Hannover Messe халықаралық өнеркәсіп көрмесі аясында Bloomberg агенттігіне берген сұхбатында.
Көптеген сарапшылар ЕО-ның жасанды интеллект саласындағы ережелерін күрделі әрі қайшылықты деп санайды. Олардың пікірінше, бұл Еуропаның аталған технологияларды дамытуда жаһандық бәсекелестерден одан әрі артта қалуына әкелуі мүмкін. Былтыр қарашада Еурокомиссия технологиялық компаниялар мен ЕО елдерінің қысымымен шектеулерді жұмсарту бойынша бірқатар ұсыныс ұсынған. Алайда Роланд Буш бұл түзетулер компанияларға түсетін жүктемені айтарлықтай төмендету үшін жеткіліксіз екенін айтты.
Дүйсенбі күні Siemens өнеркәсіптік автоматтандыруға арналған алғашқы коммерциялық жасанды интеллект жүйелерінің бірі – Eigen Engineering Agent-ті таныстырды. Кәдімгі инженерлік құралдар тек ұсыным берумен шектелсе, бұл жүйе инженерлік ортада тікелей әрекет ете алады: код генерациялайды, конфигурацияларды баптайды және өз нәтижелерін тексереді. Siemens бағалауынша, бұл технология операциялардың өнімділігін 50%-ға арттыра алады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
