Стефано Габбана Dolce & Gabbana директорлар кеңесінің төрағасы қызметінен кетті
Дизайнер компаниядағы шамамен 40% үлесіне қатысты түрлі шешімдерді қарастыруда
Итальяндық дизайнер Стефано Габбана Доменико Дольчемен бірге негізін қалаған Dolce & Gabbana сән үйінің директорлар кеңесінің төрағасы қызметінен кетті, деп жазады Kapital.kz іскерлік ақпарат орталығы Интерфакс-Қазақстан дерегіне сілтеме жасап.
Компанияның реттеушілерге арналған хабарламасында 63 жастағы Стефано Габбана бұл қызметтен өткен жылдың соңында кеткені айтылған. Қаңтар айынан бастап директорлар кеңесінің жаңа төрағасы болып қазіргі CEO және Доменико Дольченің ағасы Альфонсо Дольче тағайындалған.
Dolce & Gabbana компаниясы Габбананың бұл қызметтен кетуі «компанияның ұйымдастырушылық құрылымы мен басқару жүйесінің табиғи эволюциясымен» байланысты екенін хабарлады. «Бұл өзгерістер Стефано Габбананың шығармашылық қызметіне ешқандай әсер етпейді», – делінген компания хабарламасында.
Bloomberg агенттігі дереккөздерге сілтеме жасап, Габбана компаниядағы шамамен 40% үлесіне қатысты түрлі нұсқаларды қарастырып жатқанын хабарлады.
Компания люкс сегментіндегі ұзаққа созылған құлдырауға байланысты қиындықтарға тап болған. Сондай-ақ Таяу Шығыстағы қақтығыстардың ықтимал салдарына қатысты белгісіздік жағдайды күрделендіріп отыр. Бұл қысым компанияның қаржылық көрсеткіштеріне теріс әсер етіп, қарыздық міндеттемелерді орындауды қиындатуда.
Dolce & Gabbana қазіргі уақытта 450 млн еуро көлеміндегі қарызды қайта қаржыландыру бойынша кредиторлармен жаңа келіссөздер раундын бастағаны хабарланды, деп жазады Bloomberg дереккөздері.
Доменико Дольче мен Стефано Габбана компанияны 1985 жылы құрған және әлі күнге дейін оның креативтік бағытына жауап береді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
