• Басты бет
• Технологиялар
• Қазақстанда туристік бизнесті автоматтандыру мен ЖИ интеграциясы қашан іске қосылады?

Қазақстанда туристік бизнесті автоматтандыру мен ЖИ интеграциясы қашан іске қосылады?

Биыл Kazakhstan.travel және eQonaq жүйелері толық іске қосылады

Қазақстанның туристік нарығы толықтай цифрлық форматқа ауысып жатыр. Туризм және спорт министрі Ербол Мырзабосынов ондағы мақсат — мемлекеттік қолдау шараларын автоматтандыру, жемқорлық тәуекелдерін азайту және бизнес үшін өтінімдерді қарау мерзімін барынша қысқарту екенін айтты, деп хабарлайды Kapital.kz іскерлік ақпарат орталығының тілшісі.

Министрдің сөзінше, қазіргі таңда 900 мыңнан астам пайдаланушысы бар «eQonaq» ақпараттық жүйесі ағымдағы жылдың күзінде өнеркәсіптік қолданысқа толық енгізіледі деп жоспарланып отыр.

«Туристік ақпараттық ресурстарды AI-ассистенті бар бірыңғай Kazakhstan.travel порталына біріктіру жұмыстары жалғасуда. Портал 8 тілде қолжетімді болып, іс-шаралар күнтізбесін, туристік жарияланымдарды, фотобанкті, еліміздің туристік нысандары бойынша 3D-турларды қамтиды. Порталды іске қосу 2026 жылғы желтоқсанға жоспарланған», деді Мырзабосынов Үкімет отырысында.

Цифрлық экожүйе тек саяхатшыларға ырқымен жол сілтеп қана қоймай, медициналық және ғарыштық туризм сияқты жоғары чек әкелетін бағыттарды ілгерілету құралына айналады. Мысалы, өткен жылы елге 80 мың шетелдік пациент келген.

«Қазақстанның басты артықшылығы – көрсетілетін қызметтердің жоғары сапасы мен қолжетімді құнының үйлесуі. Отандық 10 медициналық ұйым халықаралық JCI аккредитациясына ие», деп қосты министр.

Қазір ведомство Денсаулық сақтау министрлігімен бірлесіп, 2026–2028 жылдарға арналған медициналық туризмді дамыту жөніндегі Жол картасын әзірленеп жатыр.

Бұған қоса, Қазақстандағы бірегей туристік өнімдерінің тағы бірі – әлемдегі алғашқы әрі ең ірі ғарыш айлағы Байқоңыр кешені екенін атап өтті. Байқоңыр кешенінде туризмді дамытудың 2030 жылға дейінгі тұжырымдамасы бекітілді. Ғарыш айлағына рұқсат алу мерзімінің 10 күнге дейін қысқартылуы — отандық IT және Travel-стартаптар үшін жаңа жаһандық өнімдер (мысалы, 3D-турлар, AI-гидтер) жасауға үлкен мүмкіндік ашты.

«Қазақстанға берілген Гагарин старт алаңы, монтаждау-май құю кешені және динамикалық сынақтар стенді жоғары туристік әлеуетке ие. Алайда оларды жаңғырту мен елеулі инвестициялар қажет. Әлеуетті инвесторлар үшін тизерлер әзірленді», деді Ербол Мырзабосынов.

Айта кетейік, 2025 жылғы желтоқсанда туристерді тартуға бағытталған ірі іс-шаралардың күнтізбесі бекітілген болатын. Бүгінгі таңда жоспарланған 55 іс-шараның 17-сі өткізілді. Олардың жалпы келушілер саны 150 мың адамнан асты. Өткізілген іс-шаралардың қатарында Сиверс алмасының гүлдену фестивалі, PGL киберспорттық турнирі және «Тары Фест» этнофестивалі бар.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз