- Басты бет
- Технологии
- ЖИ Шымкенттегі жылу желілерін жөндеу шығынын 75%-ға дейін қысқартты
ЖИ Шымкенттегі жылу желілерін жөндеу шығынын 75%-ға дейін қысқартты
Технологияны Өзбекстан нарығына шығару жоспарлануда
Шымкентте жылу желілерін диагностикалау бойынша жасанды интеллектті қолдану пилоттық жобасы аясында жөндеу шығындары 75%-ға дейін қысқарды. Бұл туралы үкімет отырысында энергетика министрі Ерлан Ақкенженов мәлім етті, деп хабарлайды Kapital.kz іскерлік ақпарат орталығының тілшісі
«Бұл – акустикалық резонанс әдісін қолдана отырып, құбырішілік диагностика жүргізетін роботтандырылған диагностикалық кешен. ЖИ-модель алынған деректерді талдап, жылумен жабдықтау нысандарының техникалық жағдайын бағалайды, ақауларды анықтайды және апаттық тәуекелдерді болжайды. Пилоттық жоба Шымкент қаласындағы «Қуатжылуорталық-3» МКК нысанында іске асырылды. Қазіргі уақытта жоба ауқымын кеңейту кезеңінде тұр. Өнімнің экспорттық әлеуеті бар, оны Өзбекстан нарығына шығару бойынша жұмыстар жүргізілуде. Пилот нәтижесінде Шымкентте маңызды тиімділікке қол жеткізілді: жөндеу жұмыстарына жұмсалатын бюджет 75%-ға дейін қысқарып, жылдық экономикалық тиімділік 887 млн теңгені құрады», – деді Ерлан Ақкенженов.
Бұған дейін министр энергетика саласында Қазақстанда 45 ЖИ-жобадан тұратын портфель қалыптасып жатқанын хабарлаған болатын. Оның айтуынша, жасанды интеллектті енгізу мұнай-газ, энергетика және көмір өнеркәсібін қоса алғанда негізгі салаларды қамтиды, ал 10 жоба қазірдің өзінде сараптама кезеңінен өтіп, енгізуге дайындық үстінде.
Сонымен қатар Қазақстанда экономиканың 72 саласын қамтитын 20 цифрлық трансформация картасы бекітілді. Әр картада негізгі цифрлық сын-қатерлер, ЖИ шешімдерін енгізу жоспары, әлеуметтік-экономикалық әсерлер және 2027 жылға дейінгі KPI көрсеткіштері қамтылған. Сондай-ақ елімізде халықаралық жасанды интеллект орталығы Alem.ai іске қосылған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
