• Басты бет
• Технологии
• Астаналық оқушы су тұтынуды есептейтін платформа әзірледі

Астаналық оқушы су тұтынуды есептейтін платформа әзірледі

Ирригация министрлігі сервисті енгізу бойынша жұмыс жүргізуді жоспарлап отыр

Жеке пайдаланушылардың су тұтынуын есептейтін интерактивті платформаны елорда мектеп оқушысы әзірледі. Су ресурстары және ирригация министрлігі оны енгізу бойынша жұмыс жүргізуді жоспарлап отыр, деп хабарлайды Kapital.kz іскерлік ақпарат орталығы ведомствоның баспасөз қызметіне сілтеме жасап.

«Астана қаласындағы №91 мектеп-гимназиясының 10-сынып оқушысы Жәңгір Әбуов «Су ізі» платформасын әзірледі. Бұл жүйе пайдаланушыларға жеке су тұтынуы туралы толық ақпарат алуға мүмкіндік береді. Су ресурстары және ирригация министрі Нұржан Нұржігітов жоба авторымен және №91 мектеп-гимназиясының педагогтерімен кездесу өткізді. Кездесу қорытындысы бойынша «Су ресурстарының ақпараттық-талдау орталығы» КЕАҚ пен Жәңгір Әбуовтың ата-анасы арасында «Су ізі» бағдарламасын әзірлеу бойынша ынтымақтастық туралы келісімге қол қойылды. Құжат интерактивті платформаны жетілдіру және енгізу бағытында бірлескен жұмысты көздейді», – деп хабарлады ведомство.

«Су ізі» платформасындағы есептеулер пайдаланушылардың күнделікті әдеттерін ескере отырып жүргізіледі. Оған тұрмыста және тамақтану кезінде су тұтыну, сондай-ақ су ресурстарын жанама пайдалану кіреді. Жүйе енгізілген деректерді автоматты түрде өңдеп, су тұтынуды азайтуға және күнделікті өмірде су үнемдеу тәжірибесін енгізуге бағытталған жеке ұсыныстар қалыптастырады.

Жобаның тең авторы – №91 мектеп-гимназиясының 10-сынып оқушысы Адият Шадияр балалар арасында су үнемдеу мәдениетін қалыптастыруға бағытталған қысқаметражды бейнероликтер сериясын ұсынды. Бұл роликтерде «Тамшы» анимациялық кейіпкері су ресурстарын ұтымды пайдаланудың маңызын қарапайым тілмен түсіндіріп, тұрмыста суды үнемдеудің тиімді тәсілдерін көрсетеді.

Орталық пен оқушының ата-анасы аталған ақпараттық материалдарды тарату жөнінде ынтымақтастық туралы келісімге де қол қойды.

Су ресурстары және ирригация министрі Нұржан Нұржігітов оқушылар әзірлеген жобаны жоғары бағалап, педагогтер мен ата-аналардың өскелең ұрпақ арасында су үнемдеу мәдениетін қалыптастырудағы үлесін атап өтті.

«Біздің алдымызда тұрған міндеттердің бірі – суды үнемдеу мен оған ұқыпты қарауды насихаттау арқылы халықтың су ресурстарына деген көзқарасын өзгерту. 2024 жылдан бастап балалар мен жастар арасында дұрыс экологиялық ойлау қалыптастыруға бағытталған “Суды үнемде — болашақты сақта» жобасы жүзеге асырылып келеді. Мектептерде, колледждерде және жоғары оқу орындарында экосағаттар өткізіледі. Бұл жұмысқа педагогтер мен ата-аналардың белсенді қатысуы қуантады. Ортақ күш-жігердің арқасында қоғамда су ресурстарын ұтымды пайдалану мәдениетін қалыптастыра аламыз деп сенемін», – деді ведомство басшысы.

Еске салайық, өткен жылы су ресурстары және ирригация министрлігі Алматы қаласындағы №79 гимназия оқушысы Дана Қадырбекпен меморандум жасасқан болатын. Ол заманауи наноматериалдардың көмегімен атмосферадан су жинауға арналған құрылғы әзірлеген. Жақында ол Венада өткен БҰҰ форумында үздік жас өнертапқыштардың үштігіне енді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз