• Басты бет
• Технологии
• Қазақстандағы жаңа цифрлық хабқа әлемнің ірі tech-компаниялары қызығушылық танытуда

Қазақстандағы жаңа цифрлық хабқа әлемнің ірі tech-компаниялары қызығушылық танытуда

100 МВт-тан астам қуатқа алдын ала сұраныс қалыптасты

Қазақстан Республикасының премьер-министрі мемлекет басшысының Ұлттық құрылтайдың V отырысында берген тапсырмалары аясында «Деректерді өңдеу орталықтарының алқабы» жобасының іске асырылу барысы бойынша кеңес өткізді, деп хабарлайды Primeminister.kz.

Жүргізіліп жатқан жұмыстар туралы премьер-министрдің орынбасары – жасанды интеллект және цифрлық даму министрі Жаслан Мәдиев, Энергетика министрі Ерлан Ақкенженов, Павлодар облысының әкімі Асаин Байханов, «Қазақтелеком» АҚ басқарма төрағасы Бағдат Мусин баяндады.

Павлодар облысының Екібастұз қаласында жер телімдері белгіленіп, негізгі келісімдер жасалды және қуаты 215 МВт болатын қосалқы станция сатып алынды. Бұл «деректерді өңдеу орталықтарының алқабы» жобасының энергетикалық инфрақұрылымының негізін қалыптастырады.

Инвесторлар үшін қажетті жағдайларды қалыптастыру шеңберінде өткен кеңесте энергиямен жабдықтаудың жеңілдетілген тарифтік моделі бекітіліп, қажетті инвестициялық және салықтық преференциялар айқындалды.

Бағдат Мусин халықаралық технологиялық және инвестициялық компанияларды тарту бағытында жұмыс жүргізіліп жатқанын хабарлады. АҚШ, Қытай және Үндістаннан келген 20-дан астам hyperscale-компаниямен келіссөздер өткізілді. Олар бұлтты есептеулер, үлкен деректерді өңдеу және жасанды интеллект салаларында жұмыс істейді. Келіссөздер нәтижесінде 100 МВт-тан астам қуатқа алдын ала сұраныс қалыптасты. «Деректерді өңдеу орталықтарының алқабының» жалпы әлеуеті 1 ГВт-қа дейін жетіп, ірі якорлық клиенттерді орналастыруға есептелген.

Жалпы, «Деректерді өңдеу орталықтарының алқабы» жобасын іске асыру Қазақстанда өңірлік ірі цифрлық хаб қалыптастыруға және әлемдік жетекші технологиялық компанияларды тартуға бағытталған.

Премьер-министр жобаның барлық кезеңдерін белгіленген мерзімде орындауды қамтамасыз етіп, қажетті нормативтік шешімдерді жеделдетуді тапсырды.

Бұған дейін телекоммуникациялық инфрақұрылым саласындағы ірі hyperscale және BigTech компанияларды тарту мақсатында деректерді өңдеу орталықтарының алқабында Greenfield-аймақ құрылатыны хабарланған болатын.

Еске салайық, Екібастұз қаласында «деректерді өңдеу орталықтарының алқабы» пилоттық жобасы іске асырылатыны белгілі. Жоба аясында шамамен 30 млрд АҚШ доллары көлемінде инвестиция тарту жоспарланған.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз