• Басты бет
• Технологии
• iPhone пайдаланушыларына iCloud толды деген жалған хабарламалар жіберілуде

iPhone пайдаланушыларына iCloud толды деген жалған хабарламалар жіберілуде

Қазақстандықтарға интернет-алаяқтықтың жаңа схемасы пайда болғаны туралы ескертілді

Бұлтты сервистерді пайдаланушыларға бағытталған интернет-алаяқтықтың жаңа тәсілі туралы ҚР Бас прокуратурасының Құқықтық статистика және арнайы есепке алу комитетінің Қоғамдық қауіпсіздікке қатерлер мен тәуекелдерді болжау орталығы ескертті, деп хабарлайды Kapital.kz іскерлік ақпарат орталығы.

Шетелдік дереккөздердің мәліметінше, алаяқтар iPhone пайдаланушыларына iCloud бұлтты сақтау орны толып қалды деген жалған электрондық хаттар, SMS-хабарламалар және ескертулерді жаппай таратып жатыр.

«Хабарламаларда аккаунттың бұғатталатыны және фотосуреттер, бейнелер мен құжаттар жойылуы мүмкін екені айтылады. Бұл хабарламалар танымал сервистердің ресми ескертулерін толықтай қайталайды, соның ішінде бұлтты платформалар да бар, бұл олардың шынайы екеніне сенім тудырып, пайдаланушыны әрекет етуге итермелейді. Шұғыл әрекет ету әсерін күшейту үшін қолданушыларға сілтеме арқылы өтіп, сақтау көлемін ұлғайту, төлем деректерін жаңарту немесе қолжетімділікті қалпына келтіру ұсынылады. Сілтемеге өткен жағдайда, ықтимал құрбандар түпнұсқа сервистерге ұқсас фишингтік сайтқа түседі, онда енгізілген логиндер, құпиясөздер мен банк деректері киберқылмыскерлердің қолына өтеді», – делінген хабарламада.

Мұндай тәсілмен тек iCloud емес, басқа да бұлтты сақтау сервистері (Google Drive, Mail.ru бұлты, Яндекс Диск және т.б.) атынан хабарламалар жіберілуі мүмкін.

Аталған қауіп түрі кең тарала бастағанын ескере отырып, мамандар келесіні ұсынады:

• SMS, электрондық пошта немесе мессенджерлердегі «шұғыл» хабарламалардағы сілтемелерге өтпеу;

• бұлтты сақтау орнының жағдайын тек ресми қосымшалар немесе сайттар арқылы тексеру;

• бөгде сайттарда логин, құпиясөз және банк деректерін енгізбеу;

• барлық бұлтты және пошталық аккаунттарда екі факторлы аутентификацияны қосу;

• әртүрлі сервистер үшін күрделі әрі бірегей құпиясөздерді пайдалану;

• аккаунт бұзылды деген күдік болса, дереу құпиясөзді өзгертіп, барлық белсенді сессияларды тоқтату.

Қазақстандықтарға қырағылық танытып, аккаунт бұғатталуы немесе деректердің жойылуы туралы кез келген хабарламаны тек ресми сервистер арқылы тексеру ұсынылады.

Айта кетейік, Астанада алаяқтар байланыс операторының қызметкерлері ретінде өзін таныстырып, тұрғынның ұялы телефонына қол жеткізу арқылы 20 млн теңгені жымқырған.

Елде сондай-ақ алаяқтардың өздерін компаниялар, мемлекеттік органдар және жоғары оқу орындарының басшылары ретінде таныстыратын жаңа түрі де таралуда.

Бұған дейін Ұлттық банк цифрлық теңгеге байланысты жалған инвестициялар туралы алаяқтық схема пайда болғанын хабарлаған еді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз