• Басты бет
• Технологии
• Қазақстанда энергонысандарды қорғау үшін ақ хакерлер мен ЖИ-инженерлері даярланбақ

Қазақстанда энергонысандарды қорғау үшін ақ хакерлер мен ЖИ-инженерлері даярланбақ

Жаңа кәсіптік стандарт әзірленеді

Биыл Қазақстанда «Энергетикадағы цифрландыру және жасанды интеллектіні қолдану» атты кәсіптік стандартты әзірлеу жоспарланып отыр. Ол энергонысандарды қорғауға бағытталған жаңа мамандықтарды енгізуді көздейді, деп хабарлайды Kapital.kz іскерлік ақпарат орталығы энергетика министрлігінің баспасөз қызметіне сілтеме жасап.

Аталғандай, жаңа стандарт аясында мынадай жаңа мамандықтар қарастырылған:

• интеллектуалды (ақылды) желілерді жобалаушы;

• энергетикалық жүйелерде (Smart Grid) ЖИ әзірлеу және енгізу жөніндегі инженер;

• энергетикалық желілердің киберқауіпсіздігі жөніндегі маман.

Бұл мамандықтар Қазақстанның жаңа кәсіптер мен құзыреттер атласы негізінде қалыптастырылғаны және саланы цифрлық трансформациялау талаптарына сәйкес кадрларды даярлау мен заманауи білім беру бағдарламаларын дамытуға бағытталғаны түсіндірілді.

«Ақылды» желілерді (Smart Grid) дамыту алдағы 5-10 жылдағы негізгі міндеттердің бірі болып табылады. Бұл мамандардан энергетика саласында терең біліммен қатар, жасанды интеллект бағытындағы біліктілікті де талап етеді. Себебі болашақта диспетчерлеу функцияларының бір бөлігі интеллектуалды басқару жүйелеріне беріледі. 2025 жылы салада энергетикалық жүйелерді басқару мен мониторингтің тиімділігін арттыруға, интеллектуалды технологияларды енгізуге және энергия тиімділігін күшейтуге бағытталған «Смарт-менеджер» атты жаңа мамандықтың паспорты әзірленді», – деп толықтырды энергетика министрлігінде.

Сонымен қатар, қазіргі уақытта саланың ағымдағы және перспективалық қажеттіліктерін ескере отырып, салалық біліктілік шеңбері жаңартылды. Жаңарту аясында саланың функционалдық картасы қайта қаралды; кәсіби біліктіліктер картасы өзектендірілді; салаға талдау жүргізіліп, кадрларға деген қажеттілік айқындалды; жоғары, техникалық және кәсіптік білім беру ұйымдарындағы кадр даярлау жүйесімен үйлестіру қамтамасыз етілді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз