105 елдің азаматтары Қазақстанға электронды визамен келе алады
Олардың дипломатиялық өкілдіктерге баруы міндетті емес
Дүниежүзінің 105 мемлекетінің азаматтары елшіліктерге бармай-ақ, Қазақстанға электронды визамен келе алады. Ішкі істер министрі Ержан Сәденов елімізде шетелдік мамандар мен саяхатшыларға арналған визалық бағдарламалардың аясы кеңіп, қонақтардың еркін жүріп-туруы үшін жаңа цифрлық жобалар енгізіліп жатқанын мәлімдеді. Бұл туралы Kapital.kz іскерлік ақпарат орталығының тілшісі хабарлайды.
«Бүгінгі таңда 105 елдің азаматтары елшіліктерге бармай-ақ, электронды виза арқылы келе алады. Сондай-ақ IT-мамандарға арналған Digital Nomad Visa, туристерге арналған Neo Nomad Visa беру ісі ұйымдастырылды. Шақырушы тарап қонақтардың келгені туралы онлайн форматта хабарлайды», — деді Ержан Сәденов сейсенбі күні Үкімет отырысында жасаған баяндамасында.
Ішкі істер министрінің айтуынша, ведомство шетел азаматтарына қызмет көрсету жүйесін одан әрі жетілдіріп, негізгі басымдықты цифрлық технологиялар мен ақпараттың қолжетімділігіне беріп отыр.
«Әуежайлар мен ірі шекара өткізу бекеттерінде елде болу ережелері мен шұғыл қызметтердің байланыс нөмірлері туралы қажетті ақпарат қамтылған, QR-коды бар туристік карталар беріледі. Көші-қон қызметтерінің аясын кеңейту мақсатында QazETA мобильді қосымшасы әзірленіп жатыр», — деп толықтырды министр.
Сонымен қатар Қазақстанның табиғи және мәдени орындарын тамашалауға келетін саяхатшылардың қауіпсіздігіне де ерекше мән беріліп отыр. Бүгінде өңірлерде құқық қорғау органдарының арнайы бөліністері жұмыс істейді.
«18 өңірдегі көрікті жерлер мен ұлттық парктерде қауіпсіздікті шет тілдерін меңгерген туристік полиция қызметкерлері қамтамасыз етеді», — деді Ержан Сәденов.
Жиында Ішкі істер министрі Қазақстанда ЖСН-ді мобильді қосымша арқылы да ресімдеуге болатынын айтты. Ал Экология және табиғи ресурстар министрі Ерлан Нысанбаев бір жыл ішінде еліміздегі ұлттық парктерге келушілер саны 900 мың адамға артқанын жеткізді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
