• Басты бет
• Государство
• Қазақстанда ауыл шаруашылығы жерлерінің жағдайын бақылау міндеттеледі

Қазақстанда ауыл шаруашылығы жерлерінің жағдайын бақылау міндеттеледі

Топырақты қорғау және жердің тозуын азайтуға бағытталған жаңа заң жобалары мақұлданды

Қазақстанда ауыл шаруашылығы жерлерін пайдалану тәсілдерін қайта қарау басталды. Мәжіліс депутаттары бірінші оқылымда «Топырақты қорғау туралы» және «Қазақстан Республикасының кейбір заңнамалық актілеріне топырақты қорғау мәселелері бойынша өзгерістер мен толықтырулар енгізу туралы» заң жобаларын мақұлдады, деп хабарлайды Kapital.kz іскерлік ақпарат орталығының тілшісі.

Депутат Нұржан Әшімбетовтің айтуынша, мәселе экология шеңберінен шығып, елдің стратегиялық мүдделеріне әсер етіп отыр.

«Қолда бар деректерге сәйкес, Қазақстан аумағының 75%-дан астамы әртүрлі деңгейде деградацияға ұшыраған. Бұл мәселе тек экологиялық сипатта емес, экономикалық даму мен ұлттық қауіпсіздікке де тікелей әсер ететін жүйелік қауіп екенін көрсетеді. Қолданыстағы Жер және Экологиялық кодекстер бұл бағытта бірыңғай әрі кешенді тәсілді қамтамасыз ете алмай отыр», – деді ол мәжілістегі пленарлық отырыста.

Жаңа «Топырақты қорғау туралы» заң топырақ ұғымын заңнамалық деңгейде бекітіп, оны ұтымды пайдалану талаптарын айқындайды. Құжатта мемлекеттік органдардың өкілеттіктері нақтыланып, ғылыми зерттеулердің бағыттары белгіленеді және халықаралық ынтымақтастықты дамыту қарастырылған.

Негізгі өзгерістердің бірі – топырақты қалпына келтіру тетіктеріне көшу. Ауыл шаруашылығы жерлері үшін бірқатар міндетті талаптар енгізіледі: топырақ қорғау технологияларын қолдану, ауыспалы егісті сақтау, тыңайтқыштарды ғылыми негізделген нормалар бойынша енгізу. Сонымен қатар қауіпті химиялық заттардың жиналуына жол бермеу және жер жағдайына қарай кейбір дақылдарды өсіруге шектеу қою көзделген.

Бұдан бөлек, топырақты батпақтану, су басу, тұздану, тозу және тығыздалудан қорғау шаралары қарастырылған. Сондай-ақ деградацияға ұшыраған жерлерді қалпына келтіру міндеті қойылады.

Жер пайдаланушылардың міндеттері де кеңейтіледі. Олар топырақтың су, тұз және қоректік балансын бақылап отыруға, ылғал деңгейін реттеуге, қар тоқтату технологияларын және жерді жұмсақ өңдеу әдістерін қолдануға міндеттеледі. Сонымен қатар топырақ құрылымына аз әсер ететін ауыл шаруашылығы техникасын пайдалану талап етіледі.

Заң жобасында жерді қорғау бойынша өңірлік бағдарламалар әзірлеу, ғылыми мониторинг әдістерін енгізу және деградацияны болжау модельдерін құру қарастырылған. Құралдардың қатарында қашықтан зондтау технологиялары мен жасанды интеллект элементтері де бар.

Айта кетейік, биылғы суару маусымында шамамен 11 млрд текше метр су тарту болжанып отыр.

Су ресурстарын тиімді бөлу және ұтымды пайдалану мақсатында Су ресурстары және ирригация министрлігі вегетациялық кезеңге арналған су пайдалану лимиттерін бекіткен. Оған сәйкес Қызылорда облысына 3,2 млрд текше метр, Түркістан облысына 3,8 млрд текше метр, ал Жамбыл облысына 900 млн текше метр су көлемі белгіленген.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз