• Басты бет
• Государство
• Мәжіліс «Қазақстан Халық Кеңесі» туралы конституциялық заң жобасын қарауға қабылдады

Мәжіліс «Қазақстан Халық Кеңесі» туралы конституциялық заң жобасын қарауға қабылдады

Жаңа қоғамдық институттың мәртебесі мен өкілеттіктері айқындалады

Парламент Мәжілісінің депутаттары «Қазақстан Халық Кеңесі» туралы конституциялық заң жобасын қарауға қабылдады, деп хабарлайды Kapital.kz іскерлік ақпарат орталығының тілшісі.

Депутат Асхат Аймағамбетовтің айтуынша, бұл бастама Қазақстан Республикасының жаңартылған Конституциясында бекітілген нормаларды іс жүзінде жүзеге асыру мақсатында әзірленген.

«Жоба қоғамдық келісімді нығайтуға және мемлекет пен қоғам арасындағы диалогты қамтамасыз етуге бағытталған. Заң жобасында Қазақстан Халық Кеңесінің құқықтық мәртебесі, өкілеттіктері, құрамы және қызмет тәртібі айқындалады», – деді ол.

Заң жобасын қарау жөніндегі парламент палаталарының бірлескен комиссиясының құрамына Мәжілістен депутаттар Аманжол Әлтай, Наталья Дементьева және Ерлан Саиров енді.

Айта кетейік, биыл қаңтарда Ұлттық құрылтайдың V отырысында мемлекет басшысы Қасым-Жомарт Тоқаев Қазақстан халқы Ассамблеясы мен Ұлттық құрылтайдың орнына жаңа құрылым – Қазақстан Халық Кеңесі құрылатынын мәлімдеген болатын. Жаңа органға 126 адам кіреді. Бұл өзгерістер 2026 жылғы 15 наурызда өткен референдумда дауыс бергендердің 87,15%-ының қолдауына ие болған жаңа Конституцияда көрініс тапқан.

Жаңартылған Конституция 1 шілдеден бастап ресми түрде күшіне енеді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз