• Басты бет
• Государство
• Қазақстанда такси қауіпсіздігіне бақылау күшейтіледі

Қазақстанда такси қауіпсіздігіне бақылау күшейтіледі

Тасымалдаушылар көліктер туралы деректерді міндетті түрде ұсынуы тиіс

Қазақстанда жолаушылар қауіпсіздігін арттыру мақсатында такси қызметіне қойылатын талаптар күшейтіледі. Енді тасымалдаушылар көлік құралдары туралы мәліметтерді міндетті түрде ұсынуы керек, деп хабарлайды Kapital.kz іскерлік ақпарат орталығы ұлттық экономика министрлігінің баспасөз қызметіне сілтеме жасап.

Ведомство такси тасымалдаушыларына арналған хабарлама беру қағидаларына өзгерістер енгізді. Енді қызметін бастар алдында тасымалдаушылар жергілікті атқарушы органдарға хабарлама жолдауы тиіс. Жаңартылған нысан автопаркті жаңарту кезінде, соның ішінде көліктерді ауыстыру немесе қосу барысында өзгерістер енгізу мүмкіндігін қарастырады.

Министрліктің мәліметінше, бұрынғы тәртіпте тасымалдаушы нақты көлікпен байланыстырылмаған, бұл жол-көлік оқиғалары кезінде жолаушыларға немесе үшінші тұлғаларға келтірілген зиян үшін жауапты тарапты анықтауды қиындатқан. Осыған байланысты хабарлама нысаны көлік туралы мәліметтермен толықтырылды. Енді оның маркасы, мемлекеттік нөмірі және шығарылған жылы көрсетілуі тиіс.

Жаңа талаптар такси қызметін көрсететін тасымалдаушыларды жедел анықтауға, жолаушылар қауіпсіздігін арттыруға және нарықтағы заңсыз қатысушылар үлесін азайтуға мүмкіндік береді, деп есептейді министрлік.

Өзгерістер «Қазақстан Республикасы Ұлттық экономика министрінің 2015 жылғы 6 қаңтардағы №4 «Хабарламалар нысандарын және мемлекеттік органдардың хабарламаларды қабылдау қағидаларын бекіту, сондай-ақ хабарламаларды қабылдауды жүзеге асыратын мемлекеттік органдарды айқындау туралы» бұйрығына өзгерістер енгізу туралы» бұйрыққа енгізілді.

Бұған дейін Қазақстанда такси қызметінің бағасы 17%-ға қымбаттағаны хабарланған. Өңірлер арасында әсіресе Түркістан облысында айтарлықтай өскен.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз