- Басты бет
- Государство
- Жетісу облысында тазы мен төбет өсіретін ұлттық орталық құрылады
Жетісу облысында тазы мен төбет өсіретін ұлттық орталық құрылады
Кешен құрылысы маусым айының соңына дейін аяқталмақ
Жетісу облысының Көксу ауданында қазақтың тазы және төбет тұқымдарын өсіруге арналған ұлттық орталық салынып жатыр. Бірегей кешеннің құрылыс барысымен облыс әкімі Бейбіт Исабаев танысты, деп хабарлайды Kapital.kz әкімдіктің баспасөз қызметіне сілтеме жасап.
Жоба қазақы ит тұқымдарын жаңғыртуға бағытталған және Қазақстан мен ТМД елдерінде баламасы жоқ нысан ретінде сипатталады.
Орталық аумағында барлығы 23 әкімшілік нысан бой көтерген. Олардың қатарында жатақхана, гараж, жем дайындайтын ас үй, ветеринарлық клиника және иттерді күтіп-ұстауға арналған арнайы үй-жайлар бар. Сонымен қатар иттерге арналған жүгіру жолағы, ат қора, сондай-ақ тазы мен төбеттерді аңшылыққа және салт атты адаммен бірге жүруге үйрететін жабық манеж қарастырылған.
Мердігер ұйым басшысы Рахмет Медеттің айтуынша, кешен құрылысы іс жүзінде аяқталуға жақын. Қазіргі таңда инженерлік желілер толық тартылып, абаттандыру жұмыстары жүргізіліп жатыр. Құрылыс жұмыстарын маусым айының соңына дейін толық аяқтау жоспарланған. Нысанда бүгінде 100-ге жуық адам еңбек етуде.
Жоба аясында орталықта ит өсіру бағытында жүйелі жұмыс жүргізіледі. Мұнда Экология және табиғи ресурстар министрлігі жанынан құрылған ғылыми орталық қызмет атқарады. Алдын ала мәлімет бойынша, орталықта 50 тазы және 50 төбет тұқымды ит ұсталмақ. Жоба «Астана-20» қорының демеушілік қаражаты есебінен қаржыландырылуда.
«Тазы – ерекше жануар. Қазақ халқы бұл итті жеті қазынаның бірі деп санаған. Біз тазы мен төбет тұқымдарын халықаралық деңгейде кеңінен насихаттауымыз қажет. Бұл іске сыртқы істер министрлігі де міндетті түрде атсалысуы тиіс. Тазы ерекше күтім мен баптауды талап етеді, сондықтан бұл бағытта кәсіби көзқарас маңызды. Осы мақсатта біз арнайы заң қабылдадық», – деген еді президент Қасым-Жомарт Тоқаев.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
