• Басты бет
• Государство
• Астанада Nura Elite коттедж қалашығы бойынша алаяқтық фактісі тексерілуде

Астанада Nura Elite коттедж қалашығы бойынша алаяқтық фактісі тексерілуде

Құрылыс компаниясы 3,9 млрд теңге жинап, 56 үлескер зардап шеккен

Астанада коттедж қалашығын салу үшін қаражат жинаған адал емес құрылыс салушының әрекеттерінен 56 үлескер зардап шекті. Жиналған қаражаттың жалпы сомасы 3,9 млрд теңгені құраған. Барлық дерек бойынша тергеу басталды, деп хабарлайды Kapital.kz іскерлік ақпарат орталығы Қаржылық мониторинг агенттігінің баспасөз қызметіне сілтеме жасап.

«Қаржылық мониторинг агенттігінің Астана қалалық департаменті бірнеше құрылыс компаниясының басшысы Суюншали Мөлдірге қатысты аса ірі көлемдегі алаяқтық фактісі бойынша тергеу жүргізіп жатыр. Тергеу деректеріне сәйкес, 2021-2024 жылдар аралығында Суюншали Мөлдір өзіне қарасты компаниялар арқылы Nura Elite коттедж қалашығының құрылысын салу сылтауымен азаматтардың қаражатын тартқан», – делінген хабарламада.

Ведомство мәліметінше, жоба 37 коттедж бен 24 таунхаус салуды көздеген. Бүгінгі таңда таунхаустар толық аяқталмаған (тек ғимараттардың қаңқасы ғана тұрғызылған), нысандарды 2023 жылдың IV тоқсанына дейін аяқтау міндеттемелеріне қарамастан. Сатып алушылармен алдын ала сатып алу-сату шарттары жасалған. Нәтижесінде 56 адам жәбірленуші деп танылды. Тартылған қаражаттың жалпы сомасы 3,9 млрд теңгені құрады. Бұл ретте қаражаттың бір бөлігі – 322 млн теңге Суюншали Мөлдірдің, оның жұбайы мен анасының шоттарына аударылған, сондай-ақ 145 млн теңге қолма-қол ақшаға айналдырылған.

«Жылжымайтын мүлікті екі рет сату фактісі анықталды. Атап айтқанда, толық төленген коттедждердің бірін күдікті өз жеке міндеттемелері бойынша кепіл ретінде пайдаланған, нәтижесінде нысан үшінші тұлғаларға қайта рәсімделіп, кейін бірнеше рет қайта сатылған. Суюншали Мөлдір сатып алушылармен жер учаскелеріне құқық беруді көздейтін шарттар жасаған, алайда оларды заңды түрде иеленуге құқығы болмаған», – делінген ақпаратта.

Айта кетерлігі, үлескерлер қаражатының бір бөлігі Астана қаласындағы «Асылхан» тұрғын үй кешенін салуға арналған жер телімін сатып алуға жұмсалған. Құрылысқа рұқсат құжаттары болмағанына қарамастан, ол Перизат Қайраттың «Біз біргеміз» қайырымдылық қоры арқылы БАҚ-та мұқтаж әйелге пәтер беру туралы хабарлаған. Алайда іс жүзінде тұрғын үй кешенінің құрылысы мүлде басталмаған.

Оған қатысты сот шешімімен үйқамақ түріндегі бұлтартпау шарасы санкцияланған. Тергеу жалғасуда.

Бұған дейін Астанадағы Oasis, R-Club және R-Club Deluxe тұрғын үй кешендері бойынша үлестік құрылыс істері сотқа берілгені хабарланған. Зардап шеккен үлескерлердің шығыны 8,2 млрд теңгеге бағалануда.

Астанада 4,6 млрд теңгеге тұрғын үй үлескерлері алданғаны белгілі болды. Қылмыстық схемадан 400 отбасы зардап шеккен.

Сондай-ақ әлеуметтік осал топтарға, соның ішінде көпбалалы отбасыларға, жетімдерге және мүгедектігі бар адамдарға арналған пәтерлерді заңсыз иемдену фактісі бойынша тергеу басталғаны хабарланды.

Елордада 61 құрылыс компаниясы тұрғын үйді заң бұзып сатқан.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз