• Басты бет
• Государство
• Қазақстанда әскерден қашқандарға қандай шектеу қойылады

Қазақстанда әскерден қашқандарға қандай шектеу қойылады

Бірыңғай тізілім енгізіліп, борышын өтеуден жалтарғандарға шектеу қойылуы мүмкін

Қазақстанның Қорғаныс министрлігі әскерге шақыру жүйесін реформалап, ашықтық пен бақылауды күшейтуді көздеп отыр. Енді әскерге шақыру жүйесі цифрлық форматқа көшіріледі, деп хабарлайды Kapital.kz іскерлік ақпарат орталығы ведомствоның баспасөз қызметіне сілтеме жасап.

Ведомствода өткен кеңесте әскерге шақыру жүйесін жетілдіру және жұмылдыру әлеуетін арттыру мәселелері қаралды. Жиынға бірқатар министрліктердің өкілдері қатысып, бұл бағыттың мемлекеттік саясаттағы маңызы жоғары екені атап өтілді.

Қорғаныс министрі Дәурен Қосановтың айтуынша, жаңа жүйе азаматтарды дер кезінде әрі толық ақпараттандыруға мүмкіндік береді.

«Біріңғай шақырту тізілімін енгізу хабарлау жүйесін сапалы жаңа деңгейге көтеруге мүмкіндік береді. Біз азаматтарды уақтылы әрі толық ақпараттандыруды қамтамасыз ететін, сондай-ақ олардың конституциялық міндетін орындауын жүйелі түрде қолдайтын заманауи цифрлық тетікті қалыптастырамыз», – деді ол.

Сонымен қатар, бастама аясында әскерге шақырудан жүйелі түрде жалтарып жүрген азаматтарға қатысты уақытша шектеу шараларын енгізу мүмкіндігі қарастырылуда. Бұл шаралар қолданыстағы заңнама аясында іске асырылмақ.

Жаңа жүйе ведомствоаралық өзара іс-қимылды күшейтуге де бағытталған. Мемлекеттік органдардың ақпараттық жүйелерін біріктіру арқылы деректер алмасу жеделдеп, қабылданатын шешімдердің тиімділігі артады.

«Мемлекеттік органдардың күш-жігерін үйлестіру және заманауи цифрлық шешімдерді енгізу – жүйенің тиімділігін арттырудың негізгі шарты. Біз оның ашықтығын, сенімділігін және тұрақтылығын қамтамасыз етуге тиіспіз», – деп атап өтті Қорғаныс министрі.

Кеңес барысында мерзімді әскери қызметтің тартымдылығын арттыру мәселесі де қозғалды. Атап айтқанда, сарбаздардың ай сайынғы қаржылай төлемдерін көбейту және әлеуметтік кепілдіктерді кеңейту ұсыныстары қаралды.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз