- Басты бет
- Государство
- Щучинсктегі кафе жарылысы бойынша жаңа күдіктілер ұсталды
Щучинсктегі кафе жарылысы бойынша жаңа күдіктілер ұсталды
Олардың бірі қамауға алынып, екіншісі үйқамаққа жіберілді
Щучинск қаласындағы «Центр плова Loft» кафесінде екі және одан да көп адамның қаза болуына әкелген өрт қауіпсіздігі талаптарының бұзылуы фактісі бойынша сотқа дейінгі тергеу жалғасып жатыр, деп хабарлайды Kapital.kz іскерлік ақпарат орталығының тілшісі Ақмола облысы прокуратурасының баспасөз қызметіне сілтеме жасап.
20 сәуірде автогаз құю станциясының директоры мен газ баллондарын жеткізуші ұсталды. Тергеу нұсқасына сәйкес, олар баллондарды толтыру және жеткізу қызметін көрсету барысында заң талаптарын бұзған.
Күдіктілердің әрекеті Қазақстан Республикасы Қылмыстық кодексінің 306-бабы 3-бөлігі бойынша сараланған. Бұл бап тұтынушылардың өмірі мен денсаулығына қауіпсіздік талаптарына сай келмейтін қызмет көрсетіп, абайсызда екі және одан да көп адамның денсаулығына зиян келтіруге және адамның қаза болуына әкелген жағдайларды қамтиды. Аталған бап бойынша 8 жылға дейін бас бостандығынан айыру жазасы қарастырылған.
Сот санкциясымен күдіктілердің бірі қамауға алынса, екіншісіне үйқамақ түріндегі бұлтартпау шарасы қолданылған.
Сотқа дейінгі тергеу жалғасуда, түпкілікті шешімді сот шығарады.
Еске салайық, 26–27 ақпанға қараған түні Щучинскідегі кафеде газ баллоны жарылған болатын. Алғашында 6 адамның қаза тапқаны хабарланып, кейін құрбандар саны 11 адамға жеткен. Оқиға бойынша қылмыстық іс қозғалды. Кафе иесі де ұсталып, 4 наурызда екі айға қамауға алынған еді. Оқиғаның себептері мен мән-жайын анықтау үшін ведомствоаралық комиссия құрылған. Жарылыс салдарынан 28 адам зардап шеккен: олардың 13-і ауруханаға жатқызылып, 8-і медициналық көмектен кейін үйіне жіберілген.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
