• Басты бет
• Государство
• Air Astana Дубайға рейстерін мамыр айының соңына дейін тоқтатты

Air Astana Дубайға рейстерін мамыр айының соңына дейін тоқтатты

Жолаушыларға билет құнын айыппұлсыз қайтару және тегін қайта брондау мүмкіндігі берілді

Air Astana әуе компаниясы 31 мамырға дейін Дубайға тұрақты рейстерді тоқтатты. Бұл шешім Таяу Шығыстағы шиеленісті жағдайға байланысты қабылданды, деп хабарлайды Kapital.kz іскерлік ақпарат орталығының тілшісі.

Тоқтатылған рейстердің жолаушыларына билеттер құнын толық қайтару (айыппұлсыз) немесе 31 шілдеге дейінгі мерзімде сол қызмет көрсету класы бойынша тегін қайта брондау мүмкіндігі ұсынылып отыр.

Сондай-ақ жолаушыларға маршрутты Air Astana-ның басқа рейстеріне ауыстыруға да болады, бұл жағдайда 31 шілдеге дейін ұшатын рейстер үшін тариф пен әуежай алымдарының айырмасы төленеді.

Егер билет бойынша бұған дейін айыппұл ұстала отырып қайта брондау жасалған болса, ол сома қайтарылмайтыны да хабарланды.

Әуе компаниясы өңірдегі жағдайдың дамуын бақылауды жалғастырып жатқанын және өзгерістер болса, жолаушыларға қосымша ақпарат беретінін мәлімдеді.

Еске салайық, 28 ақпанда Израиль мен АҚШ Иранның ядролық бағдарламасын жою мақсатында оның аумағына соққы жасаған еді. Бұдан кейін Иран Ислам Республикасы жауап ретінде Израильге және Таяу Шығыстың бірқатар елдеріне, атап айтқанда БАӘ, Сауд Арабиясы, Катар, Бахрейн және Кувейтке шабуыл жасады. 1 наурыз, жексенбі күні Иран тарапы ел көшбасшысы аятолла Али Хаменейдің қаза тапқанын растады.

Қазақстан Таяу Шығыстан өз азаматтарын эвакуациялауды аяқтады. Елге 10 мыңнан астам адам қайтарылды. Сыртқы істер министрлігі Мысырды сапар ұсынылмайтын елдер тізімінен алып тастады. Қазіргі таңда жағдай толық тұрақтанғанға дейін Бахрейн, Израиль, Йемен, Иордания, Ирак, Иран, Катар, Сауд Арабиясы, Кувейт, Ливан, Біріккен Араб Әмірліктері, Оман және Сирияға кез келген сапардан бас тарту жөніндегі ұсыныстар күшінде қалып отыр.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз