- Басты бет
- Государство
- Еңбек министрлігі жұмыссыздық бойынша жәрдемақы төлеу ережелерін қатаңдатпақ
Еңбек министрлігі жұмыссыздық бойынша жәрдемақы төлеу ережелерін қатаңдатпақ
Ведомство жәрдемақы есептеу жүйесіндегі олқылықтарды жойып, негізсіз төлемдердің алдын алуды көздейді
Еңбек және халықты әлеуметтік қорғау министрлігі жұмыссыздық бойынша жәрдемақы тағайындау механизмін қайта қарауды жоспарлап отыр. Бұған есептеу жүйесіндегі ерекшеліктерді пайдалану арқылы кейбір азаматтардың негізсіз жоғары төлемдер алған жағдайлары себеп болған. Бұл туралы Үкіметтегі брифингте ведомство басшысы Аскарбек Ертаев мәлімдеді, деп хабарлайды Kapital.kz іскерлік ақпарат орталығының тілшісі.
Атап айтқанда, жәрдемақының ең жоғарғы мөлшері қайта қаралып жатыр. Министрлікте кей жағдайларда төлем көлемі өте жоғары деңгейге жеткені атап өтіледі.
«Мысал ретінде бірнеше компанияда бір мезгілде жұмыс істеген бухгалтерді айтуға болады. Ол бір уақытта жұмыстан шыққаннан кейін өтініш беріп, жәрдемақы оның жиынтық табысы негізінде есептелген. Қазір жәрдемақының шекті мөлшерін қайта қарап жатырмыз. Бүгінде реттеуді қажет ететін тұстар бар. Пандемияға дейін жұмыссыз адам жәрдемақыны төрт ай алатын. Пандемия кезінде ол алты айға дейін ұзартылды, сол күйі қалып қойды. Қазір жұмыссыз ретінде тіркелген азамат үш күн ішінде есепке алынады. Бұл дұрыс емес. Пандемияға дейін он күн болатын. Біз сол он күнді қайтарамыз. Сонымен қатар жұмыссыздық бойынша жәрдемақы мерзімін төрт айға дейін қысқартамыз», – деді Аскарбек Ертаев.
Төлем мерзімін қысқартумен қатар, адамды жұмыссыз ретінде тану тәртібі де өзгереді. Билік қазіргі үш күннің орнына бұрынғы он күндік тіркеу мерзімін қайтаруды жоспарлап отыр.
Министр реформаның негізгі мақсаты негізсіз төлемдерді болдырмау екенін атап өтті. Оның айтуынша, жүйеде жұмыстан шыққаннан кейін бірден жәрдемақы рәсімдеп, қомақты қаржы алатын жағдайлар тіркелген.
«Қор айналасында пайда болған сұр схемаларды жою керек. Мақсат осы. Бізде жәрдемақы алып, өтініш беретін азаматтар бар. Тіпті кейбір жағдайларда миллион теңгеге дейін алатындар кездеседі. Мұндай болуы мүмкін емес. Жұмыс істемей-ақ осы төлемдерді алу жағдайлары бар», – деді Еңбек министрі.
Бұған дейін Қазақстанда жұмыссыз азаматтармен жеке әрі нысаналы жұмыс күшейтілетіні хабарланған болатын. Өңірлік мансап орталықтарының қызметін қайта құру арқылы азаматтарға атаулы қолдау көрсету жоспарланып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
