• Басты бет
• Государство
• Президент Мұхтар Шахановтың қайтыс болуына байланысты көңіл айтты

Президент Мұхтар Шахановтың қайтыс болуына байланысты көңіл айтты

Мемлекет басшысы ақын қазақ әдебиеті мен мәдениетінің көкжиегін кеңейткенін атап өтті

Қасым-Жомарт Тоқаев Мұхтар Шахановтың қайтыс болуына байланысты көңіл айту жеделхатын жолдады, деп хабарлайды Kapital.kz іскерлік ақпарат орталығы Ақорда баспасөз қызметіне сілтеме жасап.

Мемлекет басшысы көрнекті қазақ ақыны, қоғам қайраткері, халық жазушысы, «Қазақстанның Еңбек Ері» Мұхтар Шахановтың туған-туыстары мен жақындарына көңіл айтты.

«Мұхтар Шаханов бүкіл ғұмырын сөз өнеріне арнаған қайталанбас тұлға болды. Ол ұлттық поэзияны жаңа биіктерге көтеріп, отандық әдебиет пен мәдениеттің көкжиегін кеңейтті. Ана тілі тағдырына шын жанашыр болған ол осы саладағы көптеген маңызды бастамалардың басында тұрды. Оның шығармалары әлемнің көптеген тіліне аударылып, рухты поэзиясы кең оқырман қауымының ыстық ықыласына ие болды. Мағыналы ғұмыр кешіп, бай әдеби мұра қалдырған Мұхтар Шахановтың жарқын бейнесі жүрегімізде мәңгі сақталады», – делінген жеделхатта.

Айта кетейік, Мұхтар Шаханов 84 жасында өмірден өтті. Көрнекті ақын әрі қоғам қайраткері Түркістан облысы (бұрынғы Түлкібас ауданы) Қасқасу ауылында дүниеге келген. Оның алғашқы «Сырдария» өлеңі 1959 жылы жарияланып, тұңғыш «Бақыт» жинағы 1966 жылы жарық көрді. Кейін «Балладалар», «Жаңа ай», «Бүркіттер қияға қонбайды», «Сенім патшалығы», «Сүймегендер күтпейді», «Махаббат қорғаны», «Ғасырлар тоғысында» және басқа да поэзиялық жинақтары басылып шықты.

Автордың 30-дан астам поэзиялық кітабы бар. Ол Шыңғыс Айтматовпен бірге «Аңшының зары» эссе-кітабын және «Сократ туралы естеліктер түні немесе қалың қасыққа сот» пьесасын жазған. Бұл шығармалар түрлі театр сахналарында сәтті қойылды.

Мұхтар Шаханов КСРО Жоғарғы Кеңесінің халық депутаты, Парламент Мәжілісінің депутаты болып сайланған, Қазақстанның Қырғыз Республикасындағы елшісі қызметін атқарған. Ұзақ жылдар «Жалын» журналын басқарды.

2022 жылы Президент Мұхтар Шахановқа «Қазақстанның Еңбек Ері» атағын берді.

8 сәуірде ақынның ауруханаға түскені белгілі болған еді. Бұл туралы Мұхтар Шаханов қорының төрағасы Нұржігіт Ысқақ әлеуметтік желіде хабарлаған .

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз