• Басты бет
• Государство
• Павлодарда дәрігерлер МӘМС шеңберінде қайтыс болған адамдарды «қабылдаған»

Павлодарда дәрігерлер МӘМС шеңберінде қайтыс болған адамдарды «қабылдаған»

Жалған қызметтер медициналық ұйымдарға Медициналық сақтандыру қорының қаражатын «игеруге» мүмкіндік берген

Павлодарда халыққа медициналық көмек көрсетуге арналған бюджет қаражаты мен «Әлеуметтік медициналық сақтандыру қоры» КеАҚ активтерінің жұмсалуын тексеру барысында жалған қызмет көрсету фактілері анықталды, деп хабарлайды Kapital.kz іскерлік ақпарат орталығы Павлодар облысы прокуратурасының баспасөз қызметіне сілтеме жасап.

Қадағалау органының мәліметінше, невропатолог, кардиолог, хирург, психолог және басқа да бейінді мамандардың қабылдауы қайтыс болған адамдарға «көрсетілген». Акушер-гинеколог дәрігерінің консультациясы ер адамдарға «көрсетілген» жағдайлар да тіркелген. Сондай-ақ емдеу қызметтерін қайталау арқылы қосарланған төлем жасау фактілері анықталған.

Бұдан бөлек, тиісті маман сертификаттарынсыз және рұқсат құжаттарынсыз халыққа медициналық көмек көрсету фактілері белгілі болды.

Қадағалау актілері бойынша бұзушылықтарды жою, рұқсат құжаттарын алу және кінәлі тұлғаларды заңнамада белгіленген жауапкершілікке тарту жұмыстары жүргізілді. Қабылданған шаралар нәтижесінде 100 млн теңгеден астам шығын өтелді, деп хабарлады прокуратура.

Қазір сот қарауында 62 млн теңге көлеміндегі мемлекеттік қаражатты жымқыру және медицина саласында заңсыз кәсіпкерлік арқылы мемлекетке 41 млн теңге залал келтіру фактілері бойынша екі қылмыстық іс бар.

Еске салсақ, Алматы облысында ортодонт қабылдауы бойынша 4,5 мыңнан астам жалған қабылдау анықталған еді. Ал Түркістан облысында МӘМС аясында ондаған мың жалған қызмет «көрсетілген».

Айта кетейік, 2026 жылғы 20 қаңтарда өткен құрылтайда президент Әлеуметтік медициналық сақтандыру қорын кешенді тексеру көптеген заңбұзушылықтар мен теріс пайдалануларды анықтағанын атап өтті. Құқық қорғау органдарына «сыбайлас жемқорлық схемаларынан пайда көрген барлық тұлғаларды анықтау» тапсырылды.

Бұған дейін МӘМС саласында 26 млрд теңгеге қаржылық заңбұзушылықтар анықталғаны хабарланған болатын.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз