• Басты бет
• Государство
• Қазақстанда селекциялық әзірлемелерді қорғау күшейтіледі

Қазақстанда селекциялық әзірлемелерді қорғау күшейтіледі

Жаңа нормалар жүйені халықаралық стандарттарға жақындатып, инвестиция тартуға мүмкіндік береді

Мәжіліс депутаттары «Селекциялық жетістіктерді қорғау туралы» заң жобасын және оған ілеспе түзетулерді қарауға қабылдады. Құжаттар өсімдіктердің жаңа сұрыптары мен жануарлар тұқымдарын қорғаудың заманауи жүйесін қалыптастыруға, сондай-ақ Қазақстанды осы саладағы халықаралық құқықтық ортаға интеграциялауға бағытталған, деп хабарлайды Kapital.kz іскерлік ақпарат орталығының тілшісі.

«Заң жобалары өсімдіктердің жаңа сорттары мен жануарлар тұқымдарын қорғаудың тиімді жүйесін құру, нормаларды өсімдіктердің жаңа сұрыптарын қорғау жөніндегі халықаралық конвенция талаптарына сәйкестендіру мақсатында әзірленді. Селекционерлердің зияткерлік жетістіктерін жаңа қағидаттар мен ережелерге сәйкес қорғауға арналған жаңа құқықтық база құру көзделіп отыр», – деді мәжілістің пленарлық отырысында депутат Серік Егізбаев.

Депутаттың айтуынша, құжатты қабылдау ұлттық жүйені жаңғыртып, оның мүмкіндіктерін кеңейтеді.

«Заң жобасын қабылдау ұлттық патенттік жүйені жаһандық жүйеге интеграциялауға, құнды бастапқы селекциялық материалға қол жеткізуге, отандық селекция мен тұқым өндірісіне инвестиция тартуға, сондай-ақ қазақстандық селекция сұрыптарын әлемдік нарыққа шығаруға мүмкіндік береді», – деп түйіндеді Серік Егізбаев.

Реформа селекционерлер үшін ашық әрі қорғалған жұмыс жағдайларын қалыптастырып, қазақстандық аграрлық ғылым мен тұқым шаруашылығының халықаралық деңгейдегі бәсекеге қабілеттілігін арттырады деп күтілуде.

Бұған дейін Қазақстанда шетелдік селекция сұрыптарын сынау ақылы негізде жүргізілетіні хабарланған болатын.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз