• Басты бет
• Государство
• «ҚазТемірТранс»-тың бұрынғы вице-президентіне қатысты тергеу жүргізілуде

«ҚазТемірТранс»-тың бұрынғы вице-президентіне қатысты тергеу жүргізілуде

Күдіктіге халықаралық іздеу жарияланды

Қазақстан Республикасының Қаржылық мониторинг агенттігі «ҚазТемірТранс» АҚ-ның бұрынғы вице-президенті А.А. Капеновке қатысты қызметтік өкілеттіктерін теріс пайдалану және қаражат жымқыру дерегі бойынша сотқа дейінгі тергеп-тексеру жүргізіп жатыр, деп хабарлайды Kapital.kz іскерлік ақпарат орталығы ведомствоның баспасөз қызметіне сілтеме жасап.

Тергеу деректеріне сәйкес, А.А.Капенов қызметтік жағдайын пайдалана отырып, жүк вагондарын басқару қызметін көрсету кезінде аффилирленген компанияларға заңсыз артықшылықтар берген.

Осы әрекеттердің салдарынан «ҚазТемірТранс» АҚ-ға 5,2 млрд теңгеден астам шығын келтірілгені хабарланды.

Қазіргі уақытта А.А.Капеновке халықаралық іздеуге жарияланды. Сот сырттай қамауға алу түріндегі бұлтартпау шарасына санкция берді.

Келтірілген залалды өтеу және заңсыз алынған активтерді қайтару мақсатында Бас көлік прокуратурасы «Достық» станциясындағы терминалды сотқа дейінгі тәркілеу туралы өтінішхат жолдаған.

Астана қаласының қылмыстық істер жөніндегі ауданаралық сотының қаулысымен аталған мүлік мемлекет кірісіне өндірілді.

Тергеу жалғасып жатыр. Қылмыстық-процестік кодекстің 201-бабына сәйкес өзге ақпарат жариялауға жатпайды.

Ведомство мәліметінше, мүлікті тәркілеу Қазақстанның көлік-логистикалық әлеуетін дамыту тұжырымдамасын іске асыруға ықпал етеді.

Бұған дейін OrdaMed компаниясының негізін қалаушы әрі басшысы Еркін Ділімбетовке де іздеу жарияланған болатын.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз