Қазақстанда 5 мамырдан бастап FIFA WORLD CUP 2026 коллекциялық монеталары сатылады
Күмістен жасалған естелік монеталар шектеулі тиражбен ұсынылады
5 мамырдан бастап kazcoins.nationalbank.kz интернет-дүкені арқылы «Спорт» сериясындағы FIFA WORLD CUP 2026 коллекциялық күміс монеталарын сатып алуға болады, деп хабарлайды Kapital.kz іскерлік ақпарат орталығының тілшісі.
Монеталар 925 сынамалы күмістен алтын жалатумен, түрлі-түсті баспа технологиясын қолдана отырып дайындалған. Салмағы – 20 грамм, диаметрі – 37 мм, дайындау сапасы – «proof», номиналы – 1 000 теңге. Жалпы тиражы 2 мың дана, оның ішінде Қазақстанның ішкі нарығына 1 500 дана, ал сыртқы нарыққа 500 дана бөлінген.
Монетаның реверсінде жоғарғы бөлігінде турнирдің финалдық кезеңін қабылдайтын елдердің – Канада, АҚШ және Мексиканың тулары бейнеленген. Ортасында құрлықтары көрсетілген жер шары және «FIFA WORLD CUP 26 TM» жазуы орналасқан. Төменгі бөлігінде FIFA әлем кубогы, ал композицияның екі жағында футбол добының контурлары аясында футболшылардың силуэттері бейнеленген.
Ұлттық банктің мәліметінше, FIFA WORLD CUP 2026 коллекциялық монеталары германиялық MDM Münzhandelsgesellschaft mbH & Co. KG Deutsche Münze (MDM) нумизматикалық компаниясымен әріптестік аясында шығарылған. Компанияда 2026 жылғы футболдан әлем чемпионатына арналған коллекциялық монеталарды шығаруға FIFA-ның ресми лицензиясы бар. Бұл чемпионат тарихтағы 23-ші турнир болады және алғаш рет бір уақытта үш елде өтеді. Сонымен қатар финалдық кезеңге қатысатын ұлттық құрамалар саны 48-ге дейін ұлғайтылған.
Еске салайық, 2026 жылғы 18 ақпаннан бастап Ұлттық банк «Спорт» сериясындағы «OLYMPIC GAMES 2026. SHORT TRACK» және «Көрнекті оқиғалар мен адамдар» сериясындағы «БАЙҚОҢЫР - 70 ЖЫЛ» коллекциялық күміс монеталарын сатуды бастаған болатын. Сондай-ақ «Қазақстанның жер қойнауы» сериясындағы Zn коллекциялық монеталарын сату басталғаны хабарланған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
