Теңгенің ресми бағамы 48 валюта үшін есептеледі
Тізімге тағы тоғыз елдің валюталары қосылады
Ұлттық банк теңгенің ресми бағамы белгіленетін валюталар тізбесін кеңейту туралы қаулы жобасын әзірлейді. Тізімге тағы тоғыз елдің валюталары енгізіледі, деп хабарлайды Kapital.kz іскерлік ақпарат орталығы Ұлттық банктің баспасөз қызметіне сілтеме жасап.
«Шетел валюталарының, оларға қатысты ұлттық валютаның ресми бағамы белгіленетін тізбені өзектендіру мақсатында бұл тізімді 39 валютадан 48 валютаға дейін кеңейту қарастырылып отыр. Жоба аясында Вьетнам, Мысыр, Израиль, Индонезия, Катар, Моңғолия, Оман, Пәкістан, Румыния секілді елдердің ұлттық валюталарын қосу ұсынылуда. Тізбені кеңейту соңғы бес жылдағы сауда айналымын талдау, төлем валюталары мен көлемдері бойынша деректер, сондай-ақ жеке және заңды тұлғалардың ресми бағамдарға қатысты сұраныстарының тарихын ескере отырып жүзеге асырылды», – деп түсіндірді Ұлттық банкте.
Қаулы жобасы Ұлттық банктің теңгеге қатысты ресми бағамы белгіленетін шетел валюталарының тізбесін кеңейту, сондай-ақ құжатты 2026 жылғы 15 наурызда қабылданған ҚР Конституциясына, ҚР Салық кодексіне және Цифрлық кодексіне, «Қазақстан Республикасының Ұлттық банкі туралы» заңға және Ұлттық банк туралы ережеге сәйкестендіру мақсатында әзірленді.
Айта кетейік, Ұлттық банк валюталардың ресми бағамдарын өзінің ресми сайтында жариялап отырады.
Биржада қалыптасқан теңгенің АҚШ долларына қатысты орташа өлшенген бағамы сағат 15:30 Астана уақыты бойынша анықталып, сауда жүргізілген күннен кейінгі келесі жұмыс күніне арналған ұлттық валютаның ресми бағамы ретінде белгіленеді. Ал теңгенің өзге валюталарға қатысты бағамы сағат 16:00 Астана уақыты бойынша қалыптасқан кросс-бағамдар арқылы есептеледі.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
