• Басты бет
• Финансы
• Қазақстанның мемлекеттік облигациялары Euroclear бағалы қағаздар тізіміне енгізіледі

Қазақстанның мемлекеттік облигациялары Euroclear бағалы қағаздар тізіміне енгізіледі

Жаһандық депозитарийге қосылу 2027 жылға жоспарланып отыр

Қазақстан Республикасының мемлекеттік облигациялары Euroclear халықаралық есеп айырысу жүйесі арқылы есептелетін бағалы қағаздар тізіміне енгізіледі, деп хабарлайды Kapital.kz іскерлік ақпарат орталығы ҚР Ұлттық банкінің баспасөз қызметіне сілтеме жасап.

«Ұлттық банк хабарлағандай, жетекші жаһандық депозитарий болып табылатын Euroclear компаниясы Қазақстан Республикасының мемлекеттік облигацияларын халықаралық есеп айырысу жүйесінде есептелетін бағалы қағаздар тізіміне енгізу жобасын іске асыруды бастайды. Euroclear жүйесіне қосылу келесі жылы жергілікті инфрақұрылыммен тікелей байланыс (direct link) құру моделі бойынша жоспарланып отыр және бұл Қазақстанның қаржы нарығын дамытудағы маңызды кезеңге айналады», – деп хабарлады монетарлық реттеуші.

Жоба Қазақстанның мемлекеттік бағалы қағаздар нарығын Euroclear халықаралық жүйесімен ықпалдастыруға бағытталған. Бұл шетелдік инвесторларға қазақстандық мемлекеттік облигациялармен операцияларды қолданыстағы Clearstream халықаралық желісімен қатар, жаһандық есеп айырысу-депозитарлық инфрақұрылым арқылы тікелей жүзеге асыруға мүмкіндік береді, деп атап өтті ҚР Ұлттық банкінде.

«Жобаны іске асыру қаржы нарығын одан әрі дамыту үшін стратегиялық маңызға ие. Euroclear жүйесіне қосылу мемлекеттік бағалы қағаздар нарығының өтімділігі мен тереңдігін арттыруға, инфрақұрылымдық кедергілер мен операциялық шығындарды азайтуға, сондай-ақ Қазақстанның халықаралық инвестициялық тартымдылығын күшейтуге ықпал етеді», – делінген хабарламада.

Анықтама: Euroclear – халықаралық орталық депозитарий мен Еуропадағы ұлттық депозитарийлер желісін біріктіретін қаржылық инфрақұрылымның негізгі жаһандық провайдерлерінің бірі. Сақтаудағы активтер көлемі шамамен 40,7 трлн еуроны құрайды, жыл сайын 1,1 трлн еуродан асатын сомаға шамамен 331 млн транзакция өңделеді. Компания әлем бойынша шамамен 3,8 мың клиентке қызмет көрсетіп, халықаралық қаржы нарықтарындағы есеп айырысудың сенімділігі мен тиімділігін қамтамасыз етеді.

Еске сала кетейік, 2024 жылғы қазанда Қаржы нарығын реттеу және дамыту агенттігінің төрайымы Мәдина Әбілқасымова Euroclear және Clearstream Қазақстан депозитарийінде тікелей шоттар аша алатынын хабарлаған болатын.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз