Банктер бірыңғай QR-кодты іске қосуға дайындықты жалғастырып жатыр
Қаржы ұйымдары деректер қауіпсіздігін күшейтуде
Қазақстанда қолма-қол ақшасыз төлемдерге арналған бірыңғай банкаралық QR-код жүйесін іске қосуға дайындық жалғасуда. Ұлттық банк төрағасы Тимур Сүлейменовтің айтуынша, қазіргі уақытта банктер деректердің қауіпсіздігін қамтамасыз етуді қоса алғанда, техникалық мәселелерді шешуге баса назар аударып отыр, деп хабарлайды Kapital.kz іскерлік ақпарат орталығының тілшісі
«Мен де, әрине, бұл үдерістің тезірек жүзеге асқанын қалаймын. Бірақ бұл – криптография, цифрлық технологиялар, оны терең түсіну қажет. Ең бастысы – осы төлемдердің қауіпсіздігін қамтамасыз ету. Себебі бұл әртүрлі банктердің жүйелері, ал берілетін ақпараттың ішінде төлем, төлеуші туралы деректер, соның ішінде жеке мәліметтер бар. Мұның бәрі толық қорғалуы тиіс. Әйтпесе жақсы, серпінді жоба орнына мәселелерге тап болуымыз мүмкін. Сондықтан біз бұл жерде асықпай, банктер мен олардың техникалық қызметтеріне барынша қолайлы жағдай жасағымыз келеді», – деді Тимур Сүлейменов Астанада өткен брифингте.
Ұлттық банк интеграцияны алдағы айларда аяқтауды жоспарлап отыр.
«Жазға қарай жақсы жаңалықпен қуантамыз деп үміттенеміз. Жұмыстар, сірә, маусым айында аяқталып, шілдеден бастап жүйе іс жүзінде іске қосылады», – деді Ұлттық банк басшысы.
Еске салайық, 2024 жылы Қазақстанда екі банктің қатысуымен бірыңғай QR жүйесінің пилоттық режимі іске қосылған болатын. 2025 жылдың қарашасына қарай жүйеге алты банк қосылды. Ұлттық банк төрағасының кеңесшісі Бинұр Жаленов елдегі барлық банктермен бірыңғай QR-ды іске қосу бойынша келісімдер жасалғанын хабарлаған еді. Жоспар бойынша, 2026 жылдың бірінші тоқсанының соңына дейін барлық банктердің клиенттері бұл сервисті толық пайдалана алуы тиіс.
2026 жылдың наурыз айының басында президент Қазақстанның ірі банктеріне ескерту жасады. Мемлекет басшысы олардың банкаралық QR-төлемдерге, аударымдарға, сондай-ақ цифрлық теңгемен есеп айырысуға қосылуды созып отырғанын атап өтті.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
