Halyk Bank акционерлері қандай дивиденд алады
Төлемдер 2026 жылғы 18 мамырда басталады
Halyk Bank 2025 жыл қорытындысы бойынша жай акциялар бойынша дивиденд мөлшерін бір акцияға 30,10 теңге деңгейінде бекітті. Мұндай шешім акционерлердің жалпы жиналысында қабылданды, деп хабарлайды Kapital.kz іскерлік ақпарат орталығының тілшісі KASE-дегі қаржы институтының хабарламасына сілтеме жасап.
«Дивидендтерді төлеу 2026 жылғы 18 мамырда басталады», – делінген жарияланған ақпаратта.
Банктің 2025 жылғы таза табысының жай акциялар бойынша дивидендтер төленгеннен кейін қалған бөлігі акционерлер арасында бөлінбейді.
«Ол бөлінбеген таза табысқа бағытталады», – деп атап өтілген қаржы институтының хабарламасында.
Өткен жылы банк 2024 жылға арналған дивидендтерді екі траншпен төледі. 2025 жылғы 22 мамыр мен 29 шілде аралығында бірінші транш есептелді. Ол кезде бір жай акцияға шаққандағы дивиденд мөлшері төменірек болды – 29,64 теңге. Екінші транш бойынша дивиденд көлемі 21 теңгеден аспады. Төлемдер 2025 жылғы 25 қыркүйектен басталды.
Айта кетейік, 2026 жылғы 24 сәуірде сағат 11:45-тегі жағдай бойынша Halyk Bank акцияларымен соңғы мәміле 411,95 теңге бағамен жасалды. Көрсетілген уақытқа дейін сауда барысында ең жоғары баға 412,00 теңгеге, ең төменгі баға 411,01 теңгеге жетті. Барлығы банктің жай акцияларымен 21,3 млн теңге сомасына 51 667 мәміле жасалды.
KASE деректеріне сәйкес, бір жыл ішінде (365 күн) банктің жай акцияларының бағасы 293,37 теңгеден 412,35 теңгеге дейін өсті.
2026 жылғы 1 сәуірдегі жағдай бойынша, биржа мәліметінше, Halyk Bank-тің жай акцияларының 61,99%-ы «АЛМЭКС» холдингтік тобына, 35,09%-ы The Bank of New York-қа (номиналды ұстаушы) тиесілі. Банктің есептілігіне сәйкес, Halyk тобы Тимур Құлыбаев пен оның жұбайы Динара Құлыбаеваның нақты бақылауында.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
