ҚТЖ облигацияларына сұраныс ұсыныстан 4 есе асып түсті
Қазақстанда мәмілені Teniz Capital Investment Banking басқарды
ҚТЖ компаниясы 5 және 10 жыл мерзімге екі шығарылым ұсынды. Букбилдинг қорытындысы бойынша купондық мөлшерлемелер тиісінше жылдық 5% және 5,375% кірістілік кезінде 4,875% және 5,250% деңгейінде белгіленді. Инвесторлар шамамен 1 млрд доллар көлеміндегі орналастыруға қарсы 3,9 млрд долларға жуық өтінім берді, яғни сұраныс ұсыныстан төрт есе асып түсті.
Халықаралық андеррайтерлер ретінде Citigroup, JPMorgan Chase және Société Générale сияқты жетекші инвестициялық банктер қатысты. Ко-андеррайтерлер қатарында Abu Dhabi Commercial Bank, Deutsche Bank, Oman Investment Bank және Standard Chartered Bank болды.
Бағалы қағаздарға деген қызығушылық нарықтағы жалпы жағдаймен түсіндіріледі. Инвесторлар дамушы елдердің борыштық құралдарына қайта оралуда. ҚТЖ секілді эмитенттердің қағаздары дамыған елдердің облигацияларымен салыстырғанда жоғары кірістілік ұсынады, сонымен қатар салыстырмалы түрде сенімді деп саналады.
2025 жылдың қорытындысы бойынша ҚТЖ операциялық өсім көрсетті: топтың жиынтық кірісі мен өзге де табыстары 2 757 млрд теңгеге дейін өсті (өткен жылмен салыстырғанда +27,4%). Негізгі үлесті жүк тасымалы қамтамасыз етті, бұл бағыттағы табыс 31%-ға өсіп, 2 463 млрд теңгеге жетті. Кіріс құрылымы жүк сегменті жағына қарай ығысуын жалғастыруда. Компания өз құрылымын оңтайландырып, сонымен қатар мультимодальды платформаға көшу және бизнесті әртараптандыру бағытында логистикалық моделін кеңейтуде. Осы аяда ҚТЖ бұрын құрылған инфрақұрылымнан табыс алу негізгі мәнге ие болатын кезеңге өтуде.
Қосымша фактор ретінде Қазақстанның стратегиялық орналасуы да маңызды рөл атқарады. ҚТЖ – ұлттық теміржол операторы, ал компания үшін негізгі бағыттардың бірі – транзиттік тасымалды дамыту. Қазақстан Қытай – Еуропа дәлізінде, сондай-ақ «Орта дәліз» аясында өз позициясын күшейтіп келеді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
