KEGOC 2025 жылдың екінші жартыжылдығы үшін 22,3 млрд теңге дивиденд төлейді
Бір акцияға шамамен 81 теңгеден келеді
KEGOC 2025 жылдың екінші жартыжылдығы үшін дивиденд төлеуге 22,3 млрд теңге бағыттайды, деп хабарлайды Kapital.kz іскерлік ақпарат орталығының тілшісі компания деректеріне сілтеме жасап.
Компанияның 2025 жылғы таза пайдасы 70,8 млрд теңгені құрап, 2024 жылғы көрсеткіштен 19%-ға жоғары болды.
«2025 жылдың қорытындысы бойынша компанияның жылдық таза пайдасының 62,9%-ы дивидендке бөлінді. Осылайша, 2025 жылдың екінші жартыжылдығы үшін дивиденд төлеуге шамамен 22,3 млрд теңге бағытталады, бұл KEGOC-тың бір жай акциясына шаққанда 81 теңгені құрайды», – делінген хабарламада.
2025 жылдың екінші жартыжылдығы үшін жай акциялар бойынша дивиденд алуға құқығы бар акционерлер тізімі 2026 жылғы 12 мамырда тіркеледі. Төлем 12 маусымда басталады деп жоспарланған.
KEGOC дивидендті жылына екі рет төлейтінін нақтылады. 2014 жылдан бері олардың жалпы көлемі 327,5 млрд теңгені құрады.
Еске салайық, 2025 жылдың бірінші жартыжылдығы қорытындысы бойынша KEGOC дивиденд төлеуге 22,27 млрд теңге немесе бір акцияға 80,90 теңге бағыттаған. Бұл есепті кезеңдегі шамамен 34,3 млрд теңге таза пайданың 65%-ын құрады. 2024 жылы дивидендке таза пайданың 75,6%-ы немесе 44,98 млрд теңге, бір акцияға 163,40 теңге бөлінді. 2023 жылдың қорытындысы бойынша бұл мақсатқа 42,1 млрд теңге немесе таза пайданың 97%-ы, бір акцияға 157,24 теңге бағытталған.
KEGOC Қазақстанның бірыңғай энергетикалық жүйесінің жүйелік операторы функцияларын атқарады. Компания 2014 жылы IPO өткізіп, Қазақстан қор биржасында (KASE) акцияларының 10%-ын орналастырды. 2023 жылы AIX және KASE биржаларында SPO өтіп, оның барысында мажоритарлық акционер – «Самұрық-Қазына» мемлекеттік қоры KEGOC акцияларының 5%-ын сатты.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
