• Басты бет
• Финансы
• Зейнетақы жинақтарының артық бөлігін шешіп алу үшін жеткіліктілік шектерін мамырда көтеру жоспарлануда

Зейнетақы жинақтарының артық бөлігін шешіп алу үшін жеткіліктілік шектерін мамырда көтеру жоспарлануда

Еңбек министрлігінде есептеу әдістемесін жаңарту қажеттілігі айтылды

Үкіметтегі брифинг барысында журналистер еңбек және халықты әлеуметтік қорғау министрі Аскарбек Ертаевтан зейнетақы жинақтарының артық бөлігін шешіп алу үшін жеткіліктілік шектерін айқындау әдістемесін қайта қарау қай кезеңде тұрғанын сұрады, деп хабарлайды Kapital.kz іскерлік ақпарат орталығының тілшісі.

Министр әдістеме бойынша жұмыс жалғасып жатқанын, бірнеше келісу кезеңі өткенін түсіндірді.

«Шын мәнінде біз екі рет қаулы жобасын жолдадық. Бірінші жобада шектерді болжамды инфляция деңгейіне қарай арттыруды ұсындық. Мемлекеттік органдар оны категориялар бойынша есептейтін басқа әдістеме ұсынды. Біз қаулы жобасын қайта жолдадық, қазір ұсыныстарды күтіп отырмыз. Есептік ұсыныстар түскен соң бір формуланы таңдап, оны қаулы жобасына енгіземіз де, соңғы келісуге жібереміз», – деді ол.

Еңбек министрлігінің басшысының айтуынша, қазір ведомство түпкілікті есептерді күтіп отыр, содан кейін шектерді қайта қараудың бірыңғай формуласы бойынша шешім қабылданады.

«Бұл – біздің ұстанымымыз. Әр азамат зейнет жасына жеткенде лайықты зейнетақы алуы тиіс деп есептейміз. Мен бұған дейін де айтқанмын: 5 жылда 5 трлн теңге шешіп алынған. Бұл – несие, бұл – емделу, оны түсінемін, бірақ болашақты да ойлау керек. Минималды емес, лайықты зейнетақы болуы үшін біз жинақтарды “жеп қоюға” жол бермеуіміз керек, азаматтар жинақтауы тиіс», – деп түйіндеді ол.

Еске салайық, зейнетақы жинақтарының ең төмен жеткіліктілік шектері мерзімінен бұрын алу кезінде «артық қаражат» бойынша болашақ зейнетақы төлемдерінің нысаналы көрсеткіштеріне сүйене отырып айқындалатын болады.

2026 жылдың сәуір айының басында «Ашық НҚА» порталында зейнетақы жинақтарын мерзімінен бұрын алу кезіндегі ең төмен жеткіліктілік шектерінің параметрлерін өзгерту көзделген қаулы жобасы жарияланған болатын. Құжатты Еңбек және халықты әлеуметтік қорғау министрлігі әзірлеген.

2026 жылы зейнетақы жинақтарының жеткіліктілік шектері 2025 жылмен салыстырғанда шамамен 10%-ға өскен.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз