• Басты бет
• Финансы
• Қазақстанда ипотека бойынша шекті мөлшерлемелерді бастапқы жарнаға байланыстыру жоспарлануда

Қазақстанда ипотека бойынша шекті мөлшерлемелерді бастапқы жарнаға байланыстыру жоспарлануда

Банктер жоғары базалық мөлшерлемеге байланысты норманы кейінге қалдыруды сұрап отыр

2026 жылғы 1 шілдеден бастап Қазақстанда ипотекалық несиелеу шарттарын қайта қарау жоспарланып отыр. Мөлшерлеме бастапқы жарна көлеміне тәуелді болады. Мәжілістегі брифингте қаржы нарығын реттеу және дамыту агенттігінің төрағасы Мадина Әбілқасымова жаңа нормалар Ұлттық банкпен бірлесіп әзірленіп жатқанын және олар жылдық тиімді сыйақы мөлшерлемесінің шекті деңгейіне қатысты болатынын айтты, деп хабарлайды Kapital.kz іскерлік ақпарат орталығының тілшісі.

«Ұлттық банкпен бірлесіп біз қазір несиелер бойынша жылдық тиімді сыйақы мөлшерлемесінің шекті деңгейін белгілейтін қаулыға өзгерістер енгізуді қарастырып жатырмыз. Ипотекалық қарыздар бойынша жылдық тиімді сыйақы мөлшерлемесі мен бастапқы жарна арасындағы байланысты енгізуді жоспарлап отырмыз. Яғни бастапқы жарна 30% және одан жоғары болған жағдайда жылдық тиімді мөлшерлеме 20% деңгейінде белгіленуі мүмкін. Ал бастапқы жарна 30%-дан төмен болған несиелер үшін мөлшерлеме жоғарырақ болады», – деді Мадина Әбілқасымова.

Жаңа модель іс жүзінде жоғары бастапқы жарнаны ынталандырып, банктер үшін тәуекелдерді төмендетуге және ипотекалық портфельдің тұрақтылығын арттыруға бағытталған.

Сонымен қатар реттеуші бұл бастаманың нарықта пікірталас тудырғанын да мойындайды.

«Қаржы нарығының қатысушылары бұл норманы елдегі жағдайлар қолайлы болғанға дейін, яғни базалық мөлшерлеме төмендегенше кейінге қалдыру мәселесін көтеріп отыр», – деп қосты агенттік басшысы.

Айта кетейік, 2025 жылғы 9 маусымда ипотека бойынша шекті мөлшерлеме 25%-дан 20%-ға дейін төмендетілгені белгілі болды. Алайда 2025 жылғы 17 маусымда қаржы нарығын реттеу және дамыту агенттігі мен Ұлттық банк ипотекалық несиелер бойынша ең жоғары мөлшерлемені 20%-бен шектеу нормасын 2025 жылғы 1 қарашаға дейін тоқтата тұру туралы бірлескен қаулы қабылдады. Кейін 2025 жылғы қазанда бұл мерзім тағы да ұзартылып, 2026 жылғы 1 шілдеге шегерілді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз