Әлсіреген доллар салдарынан бюджет 146 млрд теңге көлемінде табыс ала алмады
Соған қарамастан, теңгенің нығаю әсері II-III тоқсанда оң нәтиже беруі мүмкін
Доллардың теңгеге шаққандағы бағамының төмендеуі Қазақстан бюджетінің кірісіне әсер етті. Қаржы министрлігі 146 млрд теңге көлемінде түсімнің жетіспегенін тіркеді, алайда Ұлттық банк бұл жағдайды уақытша құбылыс деп бағалап, алдағы тоқсандарда көрсеткіштердің жақсаратынын күтуде, деп хабарлайды Kapital.kz іскерлік ақпарат орталығы.
Соңғы айларда доллар бағамының төмендеуі мен теңгенің нығаюы негізгі экономикалық үрдістердің біріне айналды. Алайда бюджет үшін мұндай динамика сезімтал болып отыр, себебі кірістердің бір бөлігі долларға тәуелді экспорттық түсімдер есебінен қалыптасады.
Ұлттық банк төрағасының бірінші орынбасары Ерұлан Жамаубаев бұл жағдайдың ішкі емес, жаһандық факторлармен байланысты екенін атап өтті.
«Байқасаңыздар, тек теңге ғана емес, басқа да валюталар, соның ішінде ресейлік рубль және экономикасы ұқсас дамушы елдердің валюталары да долларға қатысты нығаюда. Бұл мұнай бағасының құбылуы мен геосаяси ахуалға байланысты», – деді ол Мәжіліс кулуарында.
Ұлттық банк төрағасының бірінші орынбасары бағамның бюджетке әсерін біржақты бағалауға болмайтынын, шығыстарды да ескеру қажет екенін айтты.
«Бюджеттің кіріс және шығыс бөліктері бар. Бұрын бағалы қағаздар шетел валютасында шығарылғанын білесіздер, олар бойынша төлемдер де шетел валютасында жүргізіледі. Яғни кірістер мен шығыстарды бірге қарастыру қажет. Меніңше, бюджет айтарлықтай зардап шеккен жоқ. Бағам әсері белгілі бір уақыттан кейін ғана көрінеді. Келесі тоқсандарда, әсіресе II-III тоқсанда оң динамика болуы ықтимал», – деді ол.
Бұған дейін Ұлттық банк төрағасы Тимур Сүлейменов теңгенің нығаюын түсіндірген болатын. Оның айтуынша, ұлттық валюта бағамына мұнай бағасының өсуі әсер етіп отыр.
Монетарлық реттеуші басшысы теңгенің тұрақтылығын атап өтіп, оның табыстылығы мен халықаралық деңгейде тартымдылығын да тілге тиек етті.
«Тәжірибе көрсеткендей, теңге – тұрақты валюта. Өткен жылдың қорытындысы бойынша жоғары табыстылық көрсетті және қазіргі таңда ең тартымды валюталардың бірі. Мұны халықаралық рейтингтер де растайды», – деп түйіндеді ол.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
