Бір жылда еліміздегі ұлттық парктерге келушілер саны 900 мың адамға артты
Қазақстандықтар мен шетелдік саяхатшылар арасында отандық табиғи орындарға деген сұраныс артып келеді
Соңғы бір жылда ерекше қорғалатын табиғи аумақтарға келушілер саны бір миллионға жуықтап, туристер ағыны айтарлықтай өсті. Саяхатшылардың көбеюіне байланысты, бірегей табиғи кешендерді сақтауға бағытталған экологиялық бастамалардың да ауқымы кеңейе түсті. Бұл туралы Үкімет отырысында Экология және табиғи ресурстар министрі Ерлан Нысанбаев мәлімдеді, деп хабарлайды Kapital.kz іскерлік ақпарат орталығының тілшісі.
Министрдің айтуынша, еліміздің табиғи аумақтары демалыс пен экологиялық туризмнің басты орталығына айналып келеді. Мәселен, 2024 жылы бұл аймақтарға 2,8 миллион адам келсе, 2025 жылы бұл көрсеткіш 3,7 миллионға жеткен. Осылайша, бір жыл ішіндегі өсім шамамен 900 мың адамды құрады.
Қазіргі таңда негізгі туристік мүмкіндіктер ұлттық парктерде шоғырланған. Бүгінде мұнда 179 туристік маршрут пен 42 экологиялық соқпақ жұмыс істеп тұр. Бұл бағыттарды дамыту табиғат аясындағы ұйымдасқан демалысты жүйелеуге және туристерді еліміздің табиғи мұрасымен жақынырақ таныстыруға мүмкіндік береді.
Саяхатшылар санының артуымен қатар өңірлерде экологиялық жобаларды жүзеге асыру жұмыстары да қатар жүріп жатыр. Солардың бірі — Мемлекет басшысының «Таза Қазақстан» бастамасы аясында қолға алынған «Таза туризм» бағдарламасы. Жобаның негізгі міндеті — табиғи аумақтарға келушілер арасында қалдықтарды жүйелі түрде сұрыптап, кәдеге жарату мәдениетін қалыптастыру.
«Жоба Шарын және Көлсай көлдері ұлттық парктерінде сәтті сынақтан өткеннен кейін, бұл бастама Іле-Алатау, Алтын-Емел, Қарқаралы, Сайрам-Өгем, Көкшетау, Баянауыл және Бурабай аумақтарын да қамтыды», — деп атап өтті Ерлан Нысанбаев.
Бағдарлама аясында ұлттық парктер аумағында қоқысты сұрыптап жинауға арналған 179 контейнер мен 81 жәшік ортанылды. Бұдан бөлек, туристерге табиғат аясында өзін ұстау ережелерін ескертетін 170 ақпараттық баннер ілініп, қайта өңделетін шикізатты қабылдайтын 7 фандомат орнатылды.
Экологиялық мәдениетті қолдаудың қосымша шарасы ретінде келушілерге демалыстан кейін парк аумағынан қоқысты өздігінен жинап, алып кетуге арналған биоыдырайтын пакеттер таратыла бастады.
«Бағдарлама аясында қалдықтарды сұрыптап жинауға арналған барлығы 179 контейнер мен 81 жәшік орнатылып, 170 ақпараттық баннер мен 7 фандомат орналастырылды. Сондай-ақ келушілерге ұлттық парктер аумағынан қоқысты өздігінен жинап, алып шығуы үшін биоыдырайтын пакеттер беріледі. Биылғы жылы бұл бағдарлама Катонқарағай, Бұйратау, Ұлытау, Жоңғар-Алатау және Тарбағатай ұлттық парктерінде іске асырылады», — деп қадап айтты министр.
Экология министрлігінің мәліметінше, экологиялық туризмді одан әрі дамыту мен табиғатты қорғау бастамаларын енгізу — ұлттық парктердің туристік тартымдылығын арттыру мен олардың экологиялық тұрақтылығын сақтау арасындағы теңгерімді қамтамасыз етуі тиіс.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
