Қызылорда облысындағы әуежай сенімгерлік басқаруға берілуі мүмкін
Өңірде заманауи сауда-логистикалық орталық құру жоспарлануда
Қызылорда облысына «Vana International Holding» халықаралық компаниясының өкілдері арнайы сапармен келді. Олар өңір әкімі Нұрлыбек Нәлібаевпен кездесіп, бірқатар маңызды жобаларды талқылады, деп хабарлайды Kapital.kz іскерлік ақпарат орталығы жергілікті атқарушы органның баспасөз қызметіне сілтеме жасап.
Кездесу барысында тараптар әуе көлігі инфрақұрылымын дамыту, оны сенімгерлік басқаруға беру арқылы заманауи басқару тетіктерін енгізу және халықаралық стандарттарға сай тиімді логистикалық хаб қалыптастыру мәселелерін қарастырды. Нәтижесінде Қызылорда облысының әкімдігі мен «Vana International Holding» арасында ынтымақтастық туралы меморандумға қол қойылды.
Әкімдіктің мәліметінше, жоба өңірдің транзиттік әлеуетін арттырып, оны ішкі және халықаралық көлік дәліздерімен тиімді ықпалдастыруға мүмкіндік береді. Сонымен қатар инвестициялық тартымдылықты күшейтіп, жаңа жұмыс орындарын ашуға ықпал етеді.
Еске салсақ, 2024 жылғы 12 қарашада Қызылорда қаласында премьер-министр Олжас Бектеновтің қатысуымен «Қорқыт Ата» әуежайының жаңа терминалы пайдалануға берілген болатын. Қазіргі таңда әуежайдан аптасына 28 рейс орындалады: оның 20-сы Астанаға, 8-і Алматыға бағытталған. Биылғы жылдың бірінші тоқсанында әуежай қызметін пайдаланған жолаушылар саны 47,6 мың адамға жетіп, өткен жылдың сәйкес кезеңімен салыстырғанда 58,5%-ға артқан.
«Әуе тасымалына сұраныстың тұрақты өсуі және жүк айналымының артуы болашақта Қызылорда облысын ірі көлік-логистикалық тораптардың біріне айналдырады. Жоспарланып отырған сауда-логистикалық орталық инфрақұрылымдық жоба ғана емес, өңір экономикасының жаңа драйверіне айналып, халықаралық сауда мен инвестиция ағындарын қайта бағыттауға ықпал ететін стратегиялық қадам болады», – деп атап өтті әкімдікте.
Бұған дейін Қызылорда облысындағы әуежайды вьетнамдық Sovico компаниясының басқаруына беру мүмкіндігі қарастырылып жатқаны хабарланған еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
