Қазақстанда цифрлық экономиканың ЖІӨ-ге әсері бағаланады
Мұндай тапсырманы президент үкіметке жүктеді
Президент Қасым-Жомарт Тоқаевтың төрағалығымен Жасанды интеллектті дамыту жөніндегі кеңестің екінші отырысы өтті, деп хабарлайды Kapital.kz іскерлік ақпарат орталығы Ақорда баспасөз қызметіне сілтеме жасап.
Өз сөзінде мемлекет басшысы әлем сапалық тұрғыдан жаңа технологиялық трансформация кезеңіне өткенін атап өтті.
Оның айтуынша, қазіргі өзгерістер қарқыны мен тереңдігі жағынан XIX-XX ғасырлардағы өнеркәсіптік революциялармен салыстыруға келмейді, әрі физикалық шындық пен цифрлық кеңістік арасындағы шекараны жойып отыр.
«Жасанды интеллект жаңа жаһандық экономиканың өзегіне айналуда, ал үлкен деректер – аса маңызды ресурсқа айналды. Осыған байланысты Қазақстан жасанды интеллектті дамытуды негізгі стратегиялық бағыт ретінде қарастырады. Біздің мақсатымыз – Қазақстанды заманауи цифрлық мемлекетке айналдыру. Біз қажетті институционалдық инфрақұрылымды құрдық, енді экономиканың барлық саласына жасанды интеллектті кеңінен енгізуді қамтамасыз етуіміз қажет. Бұл ретте біз «технологиялық сақтық» қағидатын басшылыққа ала отырып, ұлттық мүддені қатаң ұстанамыз», – деді президент.
Қасым-Жомарт Тоқаевтың пікірінше, жасанды интеллект негізіндегі жаңа технологиялық құрылымға көшу қазіргі жағдайға объективті баға беруді талап етеді.
««Цифрлық экономика» ұғымы әлі де түпкілікті анықтамаға ие болған жоқ, ал қолданыстағы әдістеме фрагменттік сипатта. Бізге ЖІӨ-нің 5% өсу көрсеткішіне қол жеткізілді деп есеп берілгенде, оның қаншалықты нақты сектор есебінен, ал қаншалықты инновацияларды енгізу нәтижесінде қалыптасқанын нақты ажырату қажет. Нақты жетістіктердің жоқтығы жалпы көрсеткіштермен бүркемеленіп, тиімділік туралы иллюзия қалыптастырады және цифрландыру мен жасанды интеллекттің экономикалық өсімге қосқан шынайы үлесін объективті бағалауға мүмкіндік бермейді. Үкімет стратегиялық жоспарлау және реформалар агенттігімен бірлесіп, цифрлық экономиканың ЖІӨ-ге әсерін бағалау бойынша ұсыныстар енгізуі тиіс», – деп тапсырма берді мемлекет басшысы.
Президенттің айтуынша, жетекші әлемдік зертханалардың соңғы деректері дамыған және дамушы экономикалар арасындағы алшақтықтың жылдам ұлғайып келе жатқанын көрсетеді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
