Өріктау кен орнындағы шикі газ Жаңажол кешенінде өңделеді
Өріктау Оперейтинг пен СНПС-Ақтөбемұнайгаз арасында келісім жасалды
«ҚазМұнайГаз» ұлттық компаниясының еншілес ұйымы – «Өріктау Оперейтинг» ЖШС мен «СНПС-Ақтөбемұнайгаз» АҚ Өріктау кен орнынан алынатын шикі газды Жаңажол мұнай-газ өңдеу кешенінің (МГӨК) қуаттарында өңдеуді көздейтін келісімге қол қойды, деп хабарлайды Kapital.kz іскерлік ақпарат орталығы «ҚазМұнайГаз» АҚ баспасөз қызметіне сілтеме жасап.
Компания мәліметінше, жоба мемлекет басшысының қолданыстағы өңдеу қуаттарын барынша жүктеу және жаңа газ кен орындарын жедел игеру жөніндегі тапсырмаларын орындау аясында жүзеге асырылуда. Сонымен қатар ол көмірсутек шикізатының перспективалы жаңа кен орындарын игеру жоспарының бір бөлігі болып саналады. Бұл жоспар аясында жаңа активтер кезең-кезеңімен өнеркәсіптік игеруге енгізіледі.
Келісім шарттарына сәйкес, жыл сайын Ақтөбе облысындағы Өріктау кен орнынан 1 млрд текше метрге дейінгі шикі газ өңдеуге жіберіледі. Өңдеу нәтижесінде 910 млн текше метрге дейін тауарлық газ, шамамен 75 мың тонна сұйытылған көмірсутек газы, 270 мың тоннаға жуық тұрақты газ конденсаты және 32 мың тоннаға дейін түйіршіктелген күкірт өндіріледі. Шикі газды алғашқы жеткізу 2026 жылдың соңына қарай күтіліп отыр.
Жобаның маңызды ерекшелігі – қолданыстағы инфрақұрылымды пайдалану. Бұл капиталдық шығындарды азайтуға, экономикалық тиімділікті арттыруға және жобаны іске қосу мерзімін қысқартуға мүмкіндік береді.
Сонымен қатар жобада экологиялық қауіпсіздік мәселелеріне және газ өңдеудің заманауи технологияларын қолдануға ерекше назар аударылған.
Жоба Ақтөбе облысының әлеуметтік-экономикалық дамуына оң әсер етеді деп күтілуде. Атап айтқанда, қосымша инфрақұрылымның дамуы және салық түсімдерінің артуы болжанып отыр.
Айта кетейік, 2025 жылдың ақпанында «Орталық Өріктау» кен орнында жылына 1 млрд текше метрге дейін газ өндіру жоспарланғаны хабарланған болатын. Ал 2023 жылдың желтоқсанында ҚМГ «Шығыс Өріктау» кен орнын өнеркәсіптік пайдалануға енгізген еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
