Air Products компаниясы Қазақстанмен серіктестікті кеңейтуге қызығушылық білдірді
Тараптар бірлескен жобалардың перспективаларын зерделемек
Қазақстан Республикасының премьер-министрі Олжас Бектенов Air Products компаниясының Еуропа және Африка өңірлері бойынша президенті Иво Болспен кездесу өткізді. Кездесу барысында өнеркәсіптік кооперацияны кеңейту, озық технологияларды енгізу және газ-химия саласында бірлескен инвестициялық жобаларды іске асыру мәселелері талқыланды, деп хабарлайды Primeminister.kz.
Air Products – өнеркәсіптік газдар саласындағы халықаралық көшбасшылардың бірі және әлемнің 50-ден астам елінде қызмет атқарады. Кездесу барысында газ-химия, көмір-химия, сутек энергетикасы бағыттарындағы ынтымақтастықты дамытуға, сондай-ақ отандық металлургия өндірістерінің тиімділігін арттыруға ерекше назар аударылды.
Олжас Бектенов Қазақстан жаңа сапалы экономикаға кезең-кезеңімен көшіп жатқанын атап өтті. Бұл ретте негізгі басымдықтар қатарында технологиялық жаңғырту, технологиялар трансфері және заманауи өндірістерді қалыптастыру бар.
«Біз жетекші халықаралық компаниялармен серіктестікке ерекше мән береміз және озық технологияларды дамыту бағытында өзара тиімді ынтымақтастыққа әрқашан ашықпыз. Қазақстанның ресурстық әлеуеті жоғары және жаңа индустриялық салаларды қалыптастыру бойынша жүйелі жұмыс жүргізіліп жатыр», – деді ол.
Иво Болс өз кезегінде Қазақстанмен серіктестікті кеңейтуге және экономиканың басым секторларында бірлескен бастамаларды жүзеге асыруға қызығушылық бар екенін жеткізді.
Кездесу қорытындысы бойынша үкімет басшысы Самұрық-Қазына қоры басқарма төрағасына Air Products компаниясымен бірлескен перспективалы жобаларды нақты пысықтау жұмыстарын жандандыруды тапсырды.
Бұған дейін 2030 жылға дейін мұнай-газ химиясы саласындағы төрт ірі жобаның инвестиция көлемі 12 млрд долларды құрайтыны хабарланған еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
