Қазақстан Грузия арқылы мал шаруашылығы өнімдерінің экспортын кеңейтеді
Dala.Camp Georgia форумында инвестиция тарту және нарықтарды біріктіру жоспарлары жарияланды
20-24 сәуір аралығында Грузия аумағында сүт және ет бағытындағы мал шаруашылығына арналған халықаралық Dala.Camp Georgia форумы өтті. Іс-шараға Қазақстан, Грузия, Өзбекстан, Әзербайжан, Қырғызстан, Тәжікстан және Түрікменстаннан 100-ден астам қатысушы жиналды.
Бес күн бойы фермерлер, қайта өңдеушілер, инвесторлар мен сарапшылар саланың негізгі трендтерін және өнімнің бәсекеге қабілеттілігін арттыру жолдарын талқылады.
Форумның басты оқиғаларының бірі – Turan қауымдастығы, Trouw Nutrition (Нидерланды) және Nutrimax (Грузия) арасында өзара түсіністік туралы меморандумға қол қойылуы болды. Құжат мал шаруашылығында ынтымақтастықты дамытуға, соның ішінде тиімділікті арттыруға және азықтандыру мен басқарудың заманауи тәсілдерін енгізуге бағытталған.
Келісім аясында қазақстандық ет, сүт, тері және жүн өнімдерінің экспортын ілгерілету қарастырылған. Сондай-ақ тараптар жем өндірісі, генетика, ветеринария және ферма басқару салаларында технология алмасуды, бірлескен білім беру бастамаларын жүзеге асыруды көздейді.
Форум барысында Turan қауымдастығы басқарма төрағасы Жәнібек Кенжебаев пен Грузияның қоршаған ортаны қорғау және ауыл шаруашылығы вице-министрі Лаша Авалиани арасында кездесу өтті. Тараптар Қазақстан өнімдерін Грузия нарығына және осы ел арқылы халықаралық нарықтарға шығару, сондай-ақ грузиялық инвестицияларды тарту мәселелерін талқылады. Жақын уақытта профильді министрлікпен жеке меморандумға қол қою жоспарланып отыр.
«Бүгінде Қазақстан мал шаруашылығын дамытудың жаңа моделін қалыптастырып жатыр – ол ашық, технологиялық және экспортқа бағытталған. Форум алаңында қол жеткізілген келісімдер – жай формалдылық емес, нарықтарымызды ықпалдастыруға бағытталған нақты қадам. Біз жүйелі қозғалыс туралы айтып отырмыз: білім алмасудан – бірлескен жобаларға, диалогтан – нақты жеткізілімдер мен серіктестікке көшу», – деді Turan қауымдастығының басшысы, Dala.Camp қауымдастығының негізін қалаушы Жәнібек Кенжебаев.
Форум барысында қатысушылар мал шаруашылығы тиімділігін арттыру үдерістерін – рацион қалыптастырудан бастап азықтандыруды басқаруға, шығындарды азайту мен өнімділікті арттыруға дейін талқылады. Цифрлық құралдарға, оның ішінде NutriOpt бағдарламасына және оның тәжірибелік қолданылуына ерекше назар аударылды.
Бағдарламаның маңызды бөлігі ретінде қатысушылар Кахетия өңіріндегі Nutrimax заманауи өндірістік кәсіпорнына барып, жем өндіру технологиясымен, сапаны бақылау жүйесімен және өндірістік процестерді ұйымдастырумен танысты.
Форумда Қазақстандағы тәжірибелік кейстер де ұсынылды. Қатысушылар сүт және ет бағытындағы шаруашылықтардың экономикасы, басқару тәсілдері және бизнесті кеңейту модельдерімен бөлісті.
«Қазақстан бүгінде тек тәжірибе алып қана қоймай, өзі де халықаралық деңгейде сұранысқа ие шешімдерді ұсынатын сараптама көзіне айналып келеді», – деп атап өтті Жәнібек Кенжебаев.
Спикерлер қатарында Нидерландтың Грузиядағы елшісі Мелине Аракелян, Trouw Nutrition компаниясының Шығыс Еуропа және Орталық Азия бойынша коммерциялық директоры Роланд ван Дален, Nutrimax негізін қалаушы Бека Бекаиа, Nutrimax бас директоры Георги Читаишвили, Nutrimax Kazakhstan директоры Реваз Лапачи, Tiar-Invest (Өзбекстан) зоотехнигі Дильшод Набиев, Unicorn Feed Limited компаниясының CEO-сы Руслан Какенов және басқа да сарапшылар болды.
Ұйымдастырушылардың айтуынша, Dala.Camp бүгінде өндірушілерді, инвесторларды және сарапшыларды біріктіретін халықаралық кәсіби қауымдастықтың қалыптасу алаңына айналып келеді.
«Бүгінде біз толыққанды экожүйенің қалыптасып жатқанын көріп отырмыз – бұл саланы талқылап қана қоймай, оның болашағын бірге құрып жатқан адамдар қауымдастығы. Dala.Camp Қазақстан шекарасынан шығып, білім, технология және бизнес үшін халықаралық платформаға айналуда», – деп қосты Жәнібек Кенжебаев.
Еске салайық, 2026 жылғы ақпанда Turan қауымдастығы Бурабайда Dala.Camp халықаралық форумын өткізіп, оған 11 елден шамамен 250 делегат қатысты.
Келесі кезең ретінде 1 мамырда Астанада Ұлттық мал шаруашылығы экспедициясы басталады. Жоба кемінде 10 өңірді қамтып, 40-қа жуық қатысушыны біріктіреді және далалық білім беру медиажоба форматында өтеді. Қатысушылар 6000 шақырымнан астам жол жүріп, жетекші шаруашылықтарды аралап, саладағы практикалық тәжірибе алады.
Экспедиция Dala.Camp бастамаларының логикалық жалғасы болып, мал шаруашылығын танымал етуге, адами капиталды дамытуға және саланы Қазақстан экономикасының негізгі өсу нүктелерінің бірі ретінде қалыптастыруға бағытталған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
