Қазақстан ядролық қаруды таратпау туралы шартты қолдайтынын мәлімдеді
Еліміз ядролық тәуекелдерді азайтуға бағытталған нақты әрі прагматикалық шараларды ілгерілетуді жақтайды
Қазақстан Республикасы ядролық қаруды таратпау туралы шарт (ЯҚТШ) режимін нығайтуды және ядролық тәуекелдерді төмендетуге бағытталған нақты әрі тиімді шараларды ілгерілетуді қолдайды. Бұл туралы 2026 жылғы 27 сәуірде Біріккен Ұлттар Ұйымы штаб-пәтерінде басталған ЯҚТШ-ға қатысушы мемлекеттердің шолу конференциясы аясында ҚР сыртқы істер министрінің бірінші орынбасары Ержан Ашықбаев мәлімдеді, деп хабарлайды Kapital.kz іскерлік ақпарат орталығы СІМ баспасөз қызметіне сілтеме жасап.
Оның айтуынша, Қазақстанның ұстанымы елдің тарихи тәжірибесіне негізделген. Атап айтқанда, Семей ядролық полигоны жабылып, ядролық арсеналдан бас тарту халықаралық қауіпсіздік пен сенімді нығайтуға қосылған маңызды үлес болып қала береді. Осы тұрғыда делегация басшысы Президент Қасым-Жомарт Тоқаев ұсынған ядролық державалар арасындағы диалогты қайта жандандыру бастамасының өзектілігін атап өтті.
Конференция барысында Қазақстан Орталық Азиядағы ядролық қарудан азат аймақ туралы шартқа (Семей шарты) төрағалық етуші ел ретінде де сөз сөйледі. Онда қатысушы мемлекеттердің жаһандық ядролық қарусыздану режимін нығайтудағы үлесі ерекше атап өтілді. Шартқа қол қойылғанына 20 жыл толуына орай, тараптар аймақаралық ынтымақтастықты дамытуға және жаңа ядролық қарудан азат аймақтар құруға шақырды.
Іс-шара аясында қазақстандық делегация басшысы БҰҰ Бас хатшысының орынбасары – қарусыздану мәселелері жөніндегі жоғары өкіл Изуми Накамицу және бірқатар елдердің делегация жетекшілерімен кездесулер өткізіп, халықаралық қауіпсіздік күн тәртібіндегі өзекті мәселелерді талқылады.
Сонымен қатар, Қазақстанның БҰҰ жанындағы тұрақты өкілі Қайрат Омаров конференцияның Екінші бас комитетінің төрағасы қызметін атқарып отыр. Бұл комитеттің мандатына ядролық қаруды таратпау, өңірлік мәселелер және МАГАТЭ кепілдіктері кіреді.
Айта кетейік, ЯҚТШ шолу конференциясы – халықаралық қауіпсіздік саласындағы маңызды алаңдардың бірі. Оның барысында қатысушы мемлекеттер шарт бойынша міндеттемелердің орындалуын талқылап, қазіргі жағдайда режимді одан әрі нығайту жолдарын қарастырады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
