ЕАЭО-да жүк ұшақтары кедендік баж бен салықтан босатылады
Жеңілдік режимі 12 жылға енгізіледі
Мәскеуде өткен Еуразиялық экономикалық комиссия кеңесінің отырысында ЕАЭО елдерінің экономикалық қызметінің негізгі бағыттарына қатысты бірқатар мәселе қаралды. Қазақстан делегациясын премьер-министрдің орынбасары – ұлттық экономика министрі Серік Жұманғарин басқарды, деп хабарлайды Primeminister.kz.
Қазақстан тарапының бастамасымен азаматтық қорғанысқа және табиғи әрі техногендік сипаттағы төтенше жағдайлардан қорғауға арналған өнімдердің қауіпсіздігі туралы техникалық регламентті қолдану жөніндегі өтпелі ережелерді ұзарту мәселесі талқыланды.
Мультимодальды транзиттік хабты дамыту аясында Қазақстан ЕЭК кеңесінде жүк әуе кемелерін кедендік баждар мен салықтардан босату мәселесін көтерді. Ұсыныс қолдау тауып, бажсыз режим 12 жыл бойы қолданылатын болды. Бұл қазақстандық әуе тасымалдаушыларына жүк әуе паркін жаңарту және пайдалану кезінде қаржылық жүктемені азайтуға (ЕАЭО Бірыңғай кедендік тарифі бойынша әуе кемелеріне салынатын қолданыстағы баж мөлшерлемелері 7,5% және 12,5%) және техниканы жеңілдікті шарттармен сатып алуға мүмкіндік береді. Жүк әуе паркін толықтыру қажеттілігі 130 әуе кемесін құрайды деп болжануда.
ЕЭК кеңесі сондай-ақ ЕАЭО-ның жекелеген елдері, оның ішінде Қазақстан үшін жарықдиодты модульдерді импорттау кезінде кедендік баждан босатуды мақұлдады. Бұл шара ЕАЭО ішіндегі өнеркәсіптік кооперацияны ынталандыруға және жарықдиодты шамдарды өндіру кезінде импорттық құрамдас бөліктерді пайдаланудың ашықтығын арттыруға бағытталған.
Сонымен қатар құрылыс материалдарын (гипс, цемент, құрылыс қоспалары және т.б.), лак-бояу өнімдерін, балаларға арналған кейбір тауарларды (самокаттар, педальді автомобильдер, қуыршақ арбалары, қуыршақтар, электрлік жарыс автомобильдерінің жиынтықтары, үстел ойындары және т.б.), сондай-ақ ерітілетін және демделетін сусындарды (шай, кофе, какао және т.б.) міндетті таңбалау туралы келісімдерге қол жеткізілді.
Әрбір мемлекет бұл талаптарды енгізудің орындылығын, мерзімдерін және тетіктерін бизнес-қоғамдастықпен талқылаудан және инфрақұрылымның дайындығын талдаудан кейін өз бетінше айқындайды.
Бұдан бөлек, мемлекеттік сатып алулар мақсатында тауарлардың шыққан елін айқындау қағидаларына өзгерістер енгізілді. Негізгі мақсат – ЕАЭО-ға мүше мемлекеттердің өндірушілеріне мемлекеттік сатып алу нарығына кедергісіз қолжетімділікті қамтамасыз ету.
Атап айтқанда, оптикалық талшықты кабель өндірісіне қойылатын талаптар белгіленді, сондай-ақ СТ-1 сертификаты арқылы қатысуға болатын тауарлар тізімі толықтырылды.
Сонымен қатар СТ-1 сертификатымен расталатын тауарлар тізімі кеңейтілді. Оған синтетикалық талшықтардан жасалған арқан-бау өнімдері, медициналық емес рентгендік тексеру қондырғылары және бұзбай бақылау жүйелері енгізілді.
Қабылданған шешімдер аталған өнім өндірушілерге өз тауарларын Еуразиялық өнеркәсіптік өнімдер тізіліміне енгізуге және Одақ елдерінің нарықтарына қолжетімділікті кеңейтуге мүмкіндік береді.
Жалпы, отырыста энергетика, табиғи монополиялар, қаржы нарықтарын реттеу, мемлекеттік сатып алулар, кедендік реттеу, тарифтік саясат және техникалық реттеу салаларындағы интеграциялық процестерді дамытуға бағытталған мәселелер қаралды.
Еске салайық, 2025 жылғы шілдеде Қазақстанда ұлттық жүк әуе тасымалдаушысын құру жоспарлары туралы хабарланған болатын. Қазақстандық жүк әуе тасымалдаушылары үшін қолдау шараларын енгізу көзделген.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
