Қазақстанда 2026 жылы 80,1 млрд теңгеге 8 өнеркәсіптік жоба іске қосылады
QazIndustry өкілдері биыл қандай өндірістер өз жұмысын бастайтыны туралы айтты
2026 жылы Қазақстанда жалпы инвестиция көлемі шамамен 80,1 млрд теңгені құрайтын сегіз өнеркәсіптік жобаны іске қосу жоспарланып отыр. Бұл жобалар аясында 1,5 мыңнан астам тұрақты жұмыс орны ашылады, деп хабарлайды Kapital.kz іскерлік ақпарат орталығы QazIndustry жобаларды мониторингтеу және талдау дирекциясына сілтеме жасап.
Биыл катодты мыс, мыс сымы, мыс кабелі, алюминий ұнтағы және легирленбеген алюминийден құйылған шыбықтар өндірісін іске қосу көзделген. Қазіргі уақытта бір жоба пайдалануға берілді: Қарағанды облысында катодты мыс өндіру іске қосылды. Жобаны жүзеге асыруға 8 млрд теңге инвестиция тартылып, 512 жұмыс орны құрылды.
«Сонымен қатар, тағы алты жоба іске асыру сатысында тұр – олар Доре қорытпасын, алюминий биллеттері мен профильдерін өндіруге бағытталған. Бұл жобаларды 2027–2028 жылдары іске қосу жоспарланған. Жалпы инвестиция көлемі 532,1 млрд теңгеден асады. Нәтижесінде 800-ден астам жұмыс орны ашылады, оның ішінде шамамен 140-ы ауылдық жерлерде», – делінген хабарламада.
Бұдан бөлек, қазіргі уақытта тағы 34 жоба пысықталу кезеңінде. Олар Доре құймаларындағы алтын мен күміс, никель штейні, легирленбеген алюминий, вольфрам, қорғасын және мырыш өндірісін қамтиды. Бұл жобаларға салынатын инвестиция көлемі 6,9 трлн теңгеге бағаланып отыр, ал болжам бойынша 17,1 мың жұмыс орны ашылады.
Жалпы алғанда, жүзеге асырылып жатқан және жоспарланған 48 жоба бойынша инвестиция көлемі шамамен 7,5 трлн теңгені құрайды. Нәтижесінде 19,4 мың жұмыс орны құрылады, оның 15,7 мыңы ауылдық жерлерде болады.
Айта кетейік, түсті металлургия өнімдерін өндіруге бағытталған ірі жобаларды Қостанай, Павлодар, Қарағанды облыстарында және Абай облысында іске асыру жоспарланған.
Бұған дейін 2026 жылы Қазақстанда 200 инвестициялық жобаны жүзеге асыру көзделіп отырғаны хабарланған. Вице-премьер – ұлттық экономика министрі Серік Жұманғариннің айтуынша, табиғи ресурстарды өңдеу және агроөнеркәсіп кешені өнімдерін қайта өңдеу салалары басым бағыттар ретінде айқындалған. Олардың қатарында қара металлургия, сирек жер металдары, химия және мұнай-химия өнеркәсібі, газ өндіру, АӨК өнімдерін терең өңдеу және фармацевтика бар.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
