• Басты бет
• Экономика
• «Дружба» мұнай құбыры: Қазақстан 260 мың тонна мұнайды балама бағыттарға жөнелтеді

«Дружба» мұнай құбыры: Қазақстан 260 мың тонна мұнайды балама бағыттарға жөнелтеді

Энергетика министрлігі өзгерістердің экспорттық жеткізілімдердің тұрақтылығына әсер етпейтінін мәлімдеді

Қазақстан 2026 жылғы мамырда «Дружба» мұнай құбыры арқылы Германия бағытына жасалған транзитті түзетуге байланысты 260 мың тонна мұнайды қайта бөледі. Көлемдер балама бағыттарға жіберіледі, деп хабарлайды Kapital.kz іскерлік ақпарат орталығының тілшісі энергетика министрлігінің баспасөз қызметіне сілтеме жасап.

««Дружба» жүйесі арқылы Германияға (Шведт МӨЗ) транзит кестесінің 2026 жылғы мамырға түзетілуіне байланысты энергетика министрлігі 260 мың тонна көлеміндегі мұнай экспортын жоспарлы түрде қайта бөлетінін хабарлайды. Көрсетілген көлемдер балама және техникалық тұрғыда пысықталған маршруттарға бағытталады: 100 мың тонна – Усть-Луга портына, 160 мың тонна – Каспий құбыр консорциумы (КҚК) жүйесіне. Ағындарды қайта бағыттау жүк жөнелтушілермен келісілген және операциялық сипатқа ие. Мұнай тасымалдау бағыттарының өзгеруі мұнай өндірудің жылдық жоспарын орындауға әсер етпейді», – деді энергетика министрінің кеңесшісі – ресми өкіл Әсел Серікбаева.

Ведомство қазіргі көлік инфрақұрылымы Қазақстанға экспорт тұрақтылығын толық көлемде қамтамасыз етуге және әлемдік нарықтарға шикізатты үздіксіз жеткізуге мүмкіндік беретінін атап өтті.

Бұған дейін энергетика министрі Ерлан Ақкенженов ресейлік тарап Қазақстан мұнайын «Дружба» құбыры арқылы Германияға айдау бойынша техникалық мүмкіндік жоқ екенін мәлімдегенін айтқан болатын. Сондай-ақ бұл Ресей инфрақұрылымына жасалған соңғы соққылармен байланысты болуы мүмкін екенін болжаған. Сонымен қатар, Ресей 1 мамырдан бастап Қазақстан мұнайының Германияға «Дружба» құбыры арқылы тасымалын уақытша тоқтатуы мүмкін екені хабарланған.

Ресей президентінің баспасөз хатшысы Дмитрий Песков Қазақстанның Германияға мұнай жеткізілімінің тоқтатылуына байланысты мүдделері басқа тасымалдау бағыттары арқылы қамтамасыз етілетінін айтқан.

Қазақстан 2023 жылдан бері «Транснефть» ЖАҚ магистральдық мұнай құбырлары жүйесі арқылы «Адамова застава» тапсыру нүктесі бағытымен Германияға мұнай жеткізіп келеді. 2026 жылдың I тоқсанында Қазақстан Германияға мұнай жеткізуді екі есеге арттырып, 730 мың тоннаға жеткізді. 2025 жылы Қазақстан мұнайының Германияға (Шведт МӨЗ) жеткізілім көлемі 2,1 млн тоннаны құрады.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз