Энергетика саласы қызметкерлеріне жеңілдетілген ипотека ұсынылмақ
Олар үшін корпоративтік тұрғын үй бағдарламалары іске қосылады
Қазақстанда энергетика саласы қызметкерлерінің тұрғын үй мәселесін шешу үшін жеңілдетілген ипотека рәсімдеуге мүмкіндік беретін корпоративтік тұрғын үй бағдарламаларын енгізу жоспарланып отыр, деп хабарлайды Kapital.kz іскерлік ақпарат орталығы энергетика министрлігінің баспасөз қызметіне сілтеме жасап.
Аталған шаралар «Көмір генерациясын дамыту» ұлттық жобасы аясында кадрлық тұрақтылықты қамтамасыз ету мақсатында жүзеге асырылады.
«Қызметкерлерді тұрғын үймен қамтамасыз ету мәселесіне ерекше назар аударылып отыр. Корпоративтік тұрғын үй бағдарламаларын енгізу жоспарлануда, оның ішінде Отбасы банк-тің “Корпоративтік” бағдарламасы негізінде жеңілдетілген несиелеу тетіктерін пайдалану көзделген. Бұл бағдарлама жұмыс берушілердің қызметкерлердің тұрғын үйін қаржыландыруға қатысуын қарастырады», – делінген хабарламада.
Ведомствоның мәліметінше, жаңа электр станцияларын салу және қолданыстағы генерация қуаттарын жаңғырту жобаларын іске асыру кадрлық әлеуетті жүйелі түрде нығайтуды талап етеді. Қазіргі уақытта генерация секторында бірқатар құрылымдық мәселелер бар, атап айтқанда, қызметкерлердің орташа жасының жоғары болуы, мамандар тапшылығы және цифрлық технологиялар мен автоматтандыру саласында заманауи құзыреттері бар жас кадрлардың жеткіліксіздігі байқалады.
Осыған байланысты кадрлық ресурстарды дамытуға бағытталған кешенді шаралар қарастырылған. Негізгі бағыттардың бірі – мамандарды даярлау және олардың біліктілігін арттыру жүйесін жетілдіру. Қазіргі басқару жүйелері, цифрлық технологиялар, өнеркәсіптік қауіпсіздік және экологиялық стандарттарға басымдық бере отырып, оқыту және қайта даярлау бағдарламаларын кеңейту жоспарланып отыр.
Сонымен қатар энергетика саласының тартымдылығын арттыру жұмыстары күшейтіледі. Атап айтқанда, еңбек жағдайларын жақсарту және қызметкерлерге арналған әлеуметтік пакетті дамыту бойынша шаралар көзделген.
Еске салайық, биыл наурыз айында премьер-министр Олжас Бектенов коммерциялық ипотеканы дамытуға жаңа тәсілдер әзірлеуді тапсырған болатын. 2026 жылы Отбасы банк 1,6 трлн теңгеге ипотекалық қарыз беруді жоспарлап отыр. Сондай-ақ 2026 жылы Қазақстанда пайдалануға берілетін тұрғын үй көлемі 18,5 млн шаршы метрді құрайды. 2025 жылы тұрғын үй қоры 13 млн шаршы метрге ұлғайды, ал бір тұрғынға шаққандағы тұрғын үймен қамтамасыз ету көрсеткіші 25,1 шаршы метр болды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
