Қазақстанда ауыл шаруашылығы техникасын жаңарту деңгейі 6,5%-ды құрады
Үкімет бұл көрсеткішті жыл сайын 10%-ға дейін жеткізуді көздейді
алмастыруды дамыту жөніндегі тапсырмалары аясында Еуропа, Канада және АҚШ-тың жетекші ауыл шаруашылығы машина жасау компанияларының басшыларымен кездесу өткізді. Кездесу барысында өнеркәсіптік кооперацияны тереңдету, өндірісті жергіліктендіру және отандық кәсіпорындар базасында заманауи агротехнологияларды енгізу мәселелері талқыланды, деп хабарлайды Primeminister.kz.
Премьер-министр атап өткендей, аграрлық сектордағы өсіп келе жатқан сұраныс ауыл шаруашылығы техникасы үшін тұрақты нарық қалыптастырады. Ауыл шаруашылығы алқаптарының көлемі бойынша Қазақстан әлемде 6-орында. Егіс алқаптары шамамен 24 млн гектарды құрайды. Өткен жылы ауыл шаруашылығының жалпы өнімі 9 трлн теңгеден асып, 6%-дан астам өсім көрсетті. Астық жинау көлемі 26 млн тоннаға, майлы дақылдар 5 млн тоннаға жетті.
«Қазақстан Президенті Қасым-Жомарт Тоқаев аграрлық сектордың технологиялық әлеуетін дамытуға ерекше назар аударады. Өндіріс көлемінің өсуі, өнімділіктің артуы және экспорттың кеңеюі фермерлердің техникалық жабдықталуына қойылатын талаптарды күшейтеді. Сондықтан техниканы жаңарту, оның қолжетімділігі және отандық өндірушілерді қолдау саланың әрі қарай дамуының негізгі шарттары болып табылады. Қазақстанның шетелдік жетекші өндірушілермен әріптестігі өзара тиімді және ұзақ мерзімді сипатқа ие. Үкімет жобаларды жергіліктендіруден бастап сыртқы нарыққа шығаруға дейін толық сүйемелдей отырып, жаңа өндірістерге жағдай жасауға дайын», — деді Олжас Бектенов.
Елде 130 мыңнан астам трактор, шамамен 30 мың комбайн және 200 мыңнан астам тіркемелі және аспалы техника пайдаланылады. Өткен жылдың қорытындысы бойынша техниканы жаңарту деңгейі 6,5%-ды құрады. Мақсат — бұл көрсеткішті жыл сайын 10%-ға дейін жеткізу.
Бұл үшін мемлекет тарапынан бірқатар қолдау шаралары енгізілген: техника сатып алу шығындарының 30%-ына дейін субсидиялау, несие мен лизинг жүктемесін төмендету, сондай-ақ отандық техника үшін 5% мөлшерлемемен жеңілдетілген қаржыландыру. Қабылданған шаралар нәтижесін беруде — соңғы екі жылда отандық техника сатылымы 35%-ға өсіп, 7,7 мыңнан 10,4 мың бірлікке жетті. Қазіргі таңда елімізде жыл сайын 8 мыңнан астам трактор мен 1,2 мың комбайн шығаратын 8 ірі кәсіпорын жұмыс істейді. Ішкі нарықтағы отандық техниканың үлесі шамамен 90%-ды құрайды.
Халықаралық серіктестер өндірісті жергіліктендіруді тереңдетуге, технология трансферіне, сервистік инфрақұрылымды дамытуға және Қазақстан нарығындағы қатысуын кеңейтуге қызығушылық білдірді. Сондай-ақ толық технологиялық тізбек қалыптастыру және фермерлер үшін жоғары технологиялық техниканың қолжетімділігін арттыру мәселелері қаралды.
«Президент пен үкіметтің жүйелі өнеркәсіптік саясаты сенім негізін қалыптастырды. Нарық көшбасшысы John Deere Қазақстанға алғашқылардың бірі болып кірді және бұл басқа жаһандық ойыншылар үшін сигнал болды. Біз жаңа технологияларды енгізіп, мамандардың біліктілігін арттырып, фермерлерді жоғары технологиялық отандық техникамен қамтамасыз етуге дайынбыз», — деді «АгромашХолдинг KZ» АҚ президенті Динара Шөкежанова.
John Deere компаниясының ТМД елдері бойынша вице-президенті Петер Заксе Қазақстанмен әріптестікті жоғары бағалап, Қостанайда өндірісті жергіліктендіру бойынша стратегиялық келісім жасалғанын атап өтті. Компания алдағы жылдары шамамен 3 мың техника шығаруды жоспарлап отыр және Қазақстанды Орталық Азиядағы негізгі серіктес ретінде қарастырады.
Бұған дейін Қазақстанда John Deere техникасын жергіліктендіру және үш сервистік орталық салу жоспарланып отырғаны хабарланған. 2024 жылғы қарашада Deere & Company, Eurasia Group және «Бәйтерек» холдингі Қазақстанда компанияның қатысуын кеңейтуге бағытталған меморандумға қол қойған. Алдағы бес жылда цифрлық технологияларды енгізу мен агроөнеркәсіп кешенінің тиімділігін арттыруға арналған үш заманауи сервистік орталық салу көзделген.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
