Алматыда көлік иелері 7 млрд теңгеден астам салық берешегін өтемеген
Борышкерлердің көліктері «Сергек» арқылы анықталып, айып тұрағына қойылуда
Алматыда көлік құралдары салығы бойынша берешекті өндіруге бағытталған «Борышкер» жедел-алдын алу іс-шарасы өтіп жатыр, деп хабарлайды Kapital.kz іскерлік ақпарат орталығының тілшісі қалалық мемлекеттік кірістер департаментінің баспасөз қызметіне сілтеме жасап.
Рейдтер барысында жеке сот орындаушыларының қаулылары бар борышкерлердің көліктері «Сергек» камералар жүйесі арқылы анықталып, қарыз толық өтелгенге дейін айып тұрағына қойылады.
Ведомство мәліметінше, бүгінде Алматыда көлік салығы бойынша 85 024 тұлғаның мойнында 7 млрд теңгеден астам берешек бар. Қарыздың едәуір бөлігі қозғалтқыш көлемі 4000 текше сантиметрден асатын көліктерге тиесілі.
Мемлекеттік кірістер департаменті көлік иелерін айып тұрағына эвакуациялау және сот орындаушылары қызметіне байланысты қосымша шығындарға жол бермеу үшін берешекті жақын арада өтеуге шақырады.
Еске салайық, Қазақстанда жол қауіпсіздігін арттыру шараларын күшейту ұсынылуда. Атап айтқанда, қалаларда орташа жылдамдықты тіркейтін камераларды енгізу, құқықбұзушылықтар үшін жазаны қатаңдату және ұқыпты жүргізушілерді ынталандыру жүйесін қатар енгізу қарастырылып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
